Як вядома, 3 ліпеня мы адзначаем галоўнае свята нашай краіны – Дзень Незалежнасці. Роўна 75 год таму ў гэты дзень была вызвалена сталіца Беларусі. Але гэты святочны дзень з’яўляецца таксама днём памяці, калі нам варта ўзгадаць людзей, якія жылі і змагаліся ў тыя складаныя часы вайны.
Надзея Цвірко і Дар’я Новікава не проста ўзгадваюць пра свайго дзеда і прадзеда Паўла Сцяпанавіча Цвірко, які ў часы Другой сусветнай вайны арганізаваў падпольны друк газеты “Сталінец”. Яны імкнуцца захаваць памяць пра яго і справы яго жыцця. Так у фонд Нацыянальнай бібліятэкі Беларусі Надзея і Дар’я падарылі 26 нумароў падпольнай газеты “Сталінец” за 1943–1944 гады, выданнем якіх займаўся іх продак.
Павал Цвірко быў адным з арганізатараў падпольнай групы на Случчыне. У партызанскай зоне ён узнавіў выданне раённай газеты “Сталінец”, органа Грэскага райкама КП Беларусі і раённага Савета дэпутатаў працоўных. Як рэдактар, а пасля намеснік рэдактара ён напісаў больш за ста лістовак і зваротаў да насельніцтва. І гэта нягледзячы на цяжкую хваробу, прыпадкі эпілепсіі. Умовы для працы былі надзвычай цяжкімі. У падполлі атрымалася надрукаваць 31 нумар у 1943-м і 36 – у 1944 годзе.
Гэтыя выданні – цудоўны прыклад падпольнага партызанскага друку на тэрыторыі Беларусі. Асноўны змест выданняў, канечне ж, складалі навіны з фронту, паведамленні пра баявыя дзеянні партызан, вызваленыя вёскі і гарады Беларусі, а таксама пра нацысцкія злачынствы. На захаваных старонках газеты можна знайсці і творы беларускіх пісьменнікаў, напрыклад, верш Максіма Танка, зварот Кандрата Крапівы.
Нацыянальная бібліятэка Беларусі збірае артэфакты нацыянальнай памяці Беларусі, у тым ліку мае калекцыю партызанскага і падпольнага друку. Сёння яе фонды папоўніліся матэрыяламі, якія адлюстроўваюць адзін з самых драматычных перыядаў нашай гісторыі.
Выказваем шчырую ўдзячнасць сям’і Цвірко, якая зрабіла такі каштоўны падарунак НББ напярэдадні дня вызвалення Мінска.
Матэрыял прадастаўлены навукова-даследчым аддзелам кнігазнаўства.
Глядзіце таксама сюжэт телеканала ОНТ, прысвечаны перадачы ў дар 26 нумароў газеты “Сталінец”.
