Напярэдадні Дня Перамогі ў Нацыянальнай бібліятэцы прайшла першая экскурсія, прысвечаная творчасці Івана Шамякіна. Яна распрацавана ў межах цыкла “Славутыя імёны Бацькаўшчыны” і прымеркавана да 100-годдзя з дня нараджэння класіка беларускай літаратуры.
Навучэнцы Мінскага дзяржаўнага ліцэя № 7 будаўніцтва азнаёміліся з біяграфіяй пісьменніка і гісторыяй стварэння яго вядомых твораў “Трывожнае шчасце”, “Сэрца на далоні”, “Гандлярка і паэт”, “Вазьму твой боль”, “Глыбокая плынь”, прысвечаных падзеям Вялікай Айчыннай вайны. Падчас экскурсіі госці пагарталі выданні твораў розных гадоў, даведаліся пра гісторыю іх экранізацый, паслухалі ўрывак з аўдыякнігі “Трывожнае шчасце”.
Таксама экскурсанты завіталі ў адну з галерэй бібліятэкі на выстаўку “Каб чалавек жыў як чалавек…”, дзе ўбачылі ілюстрацыі вядомых беларускіх мастакоў да кніг Івана Шамякіна і Івана Мележа.
Напрыканцы экскурсіі для замацавання атрыманых ведаў маладыя людзі выканалі шэраг інтэрактыўных заданняў.
Запрашаем на экскурсіі з цыкла “Славутыя імёны Бацькаўшчыны” па творчасці Івана Шамякіна, Аркадзя Куляшова, Пімена Панчанкі, Максіма Танка, Васіля Быкава, а таксама Янкі Купалы, Якуба Коласа, Максіма Багдановіча, Кандрата Крапівы, Міхася Зарэцкага, Янкі Маўра, Уладзіміра Караткевіча, Еўфрасінні Полацкай, Францыска Скарыны і Марка Шагала.
Заяўкі прымаюцца з 10.00 да 18.00 з аўторка па нядзелю.
Тэлефоны для запісу: (8 017) 293 29 66, 293 28 53.
Матэрыял пададзены аддзелам экскурсійна-метадычнай работы.
