12 чэрвеня ў аздараўленчым лагеры “На ростанях” супрацоўнікі бібліятэкі правялі першую выязную экскурсію па творчасці Якуба Коласа з цыкла “Славутыя імёны Бацькаўшчыны”.
Дзецям у інтэрактыўнай форме было прапанавана азнаёміцца з цікавымі фактамі пра Нацыянальную бібліятэку, больш даведацца пра жыццё і творчасць Якуба Коласа, віртуальна зазірнуць у тыя куткі нашай краіны, з якімі было звязана жыццё пісьменніка.
Хлопчыкі і дзяўчаткі прагледзелі прэзентацыю па творчасці вядомага земляка, пазнаёміліся з кніжнай выстаўкай твораў Якуба Коласа розных гадоў.
У Год малой радзімы экскурсанты таксама змаглі пагартаць выданні з фондаў бібліятэкі па гісторыі Міншчыны, паглядзець некалькі серый мультфільма “Аповесць мінулых гадоў”, прысвечанага паходжанню гербаў гарадоў Беларусі. У канцы экскурсіі ўсіх чакалі памятныя сувеніры.
Дарэчы, дзецям і самім ёсць што расказаць пра вядомага земляка, бо прама на месцы іх лагера жыў і працаваў Якуб Колас, менавіта тут знаходзілася яго дача. А дом, у якім класік рэдагаваў раман “На ростанях” і напісаў многія свае творы, захаваўся! Таму ўдвая прыемна, што хлопчыкі і дзяўчаткі з цікавасцю паставіліся да віртуальнага экскурсу і актыўна ў ім удзельнічалі.
Заказаць выязную экскурсію з цыкла “Славутыя імёны Бацькаўшчыны” па творчасці Янкі Маўра, Янкі Купалы, Якуба Коласа можна па тэлефонах: (8 017) 293 28 53, 293 29 66.
Запрашаем аздараўленчыя лагеры да супрацоўніцтва!