7 снежня ў музеі кнігі Нацыянальнай бібліятэкі Беларусі напярэдадні 130-годдзя з дня нараджэння класіка беларускай літаратуры Максіма Багдановіча адбылося адкрыццё выставы “Бібліятэка Максіма”.
Праект Нацыянальнай бібліятэкі Беларусі і філіяла Дзяржаўнага музея гісторыі беларускай літаратуры “Літаратурны музей Максіма Багдановіча” стаў магчымым дзякуючы даследаванням, архіўным дакументам, успамінам і ліставанню М. Багдановіча і ўключае ў сябе музейную рэканструкцыю бібліятэкі “беларусікі” класіка айчыннай літаратуры і кніжна-ілюстрацыйную экспазіцыю, прысвечаную творцу.
У межах музейнай рэканструкцыі бібліятэкі прадстаўлены асобнікі з аўтографамі паэта, беларускія выданні пачатку ХХ ст. з выдавецтваў Санкт-Пецярбурга, Вільні і Мінска, першыя беларускія газеты і календары, першыя выпускі твораў класікаў айчыннай літаратуры (выданні беларускіх суполак, у тым ліку знакамітай “Загляне сонца і ў наша аконца”) і іншыя каштоўныя матэрыялы, якія маглі б захоўвацца ў Максіма Багдановіча.
Мерапрыемства распачалі творчыя нумары ў выкананні мастацкага кіраўніка народнага літаратурнага тэатра “Жывое слова” Алесі Сівохінай і яго ўдзельніцы Маргарыты Стрыевіч.
Намеснік генеральнага дырэктара Нацыянальнай бібліятэкі Беларусі Аляксандр Суша павітаў прысутных і адзначыў: “Імя Максіма Багдановіча вядома кожнаму беларусу. У значнай меры гэтаму паспрыяла і дзейнасць нашай установы: прыжыццёвыя выданні пісьменніка ганарова захоўваліся тут дзесяцігоддзямі, а вядомы бібліёграф і літаратуразнаўца Дзяржаўнай бібліятэкі БССР імя У.І. Леніна (Нацыянальнай бібліятэкі Беларусі) Ніна Ватацы зрабіла значны ўнёсак у збор і захаванне спадчыны паэта і стварэння Літаратурнага музея М. Багдановіча. Дзякуючы гэтаму сёння мы можам казаць пра феномен нацыянальнага генія і творцы вельмі высокага сусветнага ўзроўню. Рэканструкцыя ўласнай бібліятэкі беларускага класіка дазволіць асэнсаваць яго творчасць”.
Загадчык Літаратурнага музея Максіма Багдановіча Міхаіл Бараноўскі расказаў пра падрыхтоўку экспазіцыі: “Лічылася, што бібліятэка беларускага класіка знішчана. Але ёсць дакументальныя звесткі пра ўласную бібліятэку «беларусікі» Максіма Багдановіча. Прадстаўленая экспазіцыя – спроба ўзнавіць спіс кніжак, якімі карыстаўся сам Максім”.
Літаратуразнаўца, перакладчык, кандыдат філалагічных навук, дацэнт Мікалай Трус працягнуў думку папярэдніх выступоўцаў і падкрэсліў, што рэканструкцыя ўласнай бібліятэкі Максіма Багдановіча дапаможа зразумець кантэкст і час, ацаніць вытокі яго творчасці.
Кніжна-ілюстрацыйная экспазіцыя з фондаў Нацыянальнай бібліятэкі Беларусі пазнаёміць з выданнямі твораў мастака слова, літаратурай пра жыццё і творчасць беларускага песняра, перакладамі і юбілейнымі выданнямі. Сярод іх ёсць прыжыццёвыя выданні – зборнік выбраных вершаў “Вянок” (1913), публіцыстычныя брашуры “Братья-чехи” (1914) і “Беларускае адраджэнне” (1916), выданні поўных збораў твораў паэта, першы з якіх убачыў свет у 1927–1928 гг., пераклады паэзіі Максіма Багдановіча на славянскія, еўрапейскія і азіяцкія мовы.
Асобны раздзел выстаўкі складаюць адметныя выданні, падрыхтаваныя да юбілеяў М. Багдановіча. Сярод іх – зборнікі канферэнцый, даследаванні, аналітычныя матэрыялы, энцыклапедычныя выданні. Асабліва цікавымі для наведвальнікаў будуць каталог “Аўтографы Максіма Багдановіча” (2021), які змяшчае ўсе вядомыя на сёння аўтографы паэта з музеяў, архіваў, бібліятэк Беларусі, Літвы, Расіі, Украіны; выданне “Максім Багдановіч” з серыі “Жыццё знакамітых людзей Беларусі” (2021) і падрыхтаваны супрацоўнікамі музея Максіма Багдановіча выпуск “Архіўныя матэрыялы да жыцця і творчасці Максіма Багдановіча. Сшытак 3”, які складаецца з эпісталярнай спадчыны родных паэта.
Запрашаем да знаёмства з выставачным праектам усіх, хто цікавіцца нацыянальнай літаратурнай і духоўнай спадчынай зоркі беларускай літаратуры Максіма Багдановіча!
Выстаўка дэманструецца да 30 студзеня 2022 г. у музеі кнігі (пам. 347) і кальцавым калідоры 2-га паверха.
Дата заканчэння працы экспазіцыі можа быць зменена.
Час работы выставы адпавядае рэжыму работы музея кнігі.
Уваход па чытацкім білеце або білеце сацыякультурнага цэнтра.
Тэлефон для даведак: (8 017) 293 28 81.
Матэрыял пададзены аддзелам сувязей з грамадскасцю.
