16 верасня ў галоўнай бібліятэцы краіны працягнуў работу IX Міжнародны кангрэс "Бібліятэка як феномен культуры", прысвечаны 100-годдзю Нацыянальнай бібліятэкі Беларусі.
Дэлегаты з Беларусі і краін блізкага замежжа – Азербайджана, Казахстана, Кыргызстана, Расіі, Таджыкістана, Узбекістана – узялі ўдзел у рабоце секцыйных пасяджэнняў "Гісторыя бібліятэк і бібліятэчных збораў" і "Сацыякультурная дзейнасць: сучасныя эфектыўныя практыкі", семінары “Пазабюджэтная дзейнасць у сацыякультурнай сферы” і дыскусійнай пляцоўцы "Электронныя інфармацыйныя рэсурсы: адкрыты дыялог бібліятэк і выдаўцоў".
Супрацоўнікі бібліятэк, эксперты і запрошаныя госці выступілі з дакладамі і падзяліліся назапашаным вопытам, расказалі аб рэалізаваных праектах, акрэслілі тэндэнцыі ў бібліятэчнай сферы.
Пасля заканчэння форуму кіраўнікі і аўтарытэтныя спецыялісты найбуйнейшых бібліятэк, архіваў, музеяў, выдавецтваў, вядучых навукова-даследчых арганізацый і адукацыйных устаноў, вытворцы праграмнага забеспячэння, тэхнічных сродкаў, інфармацыйнай прадукцыі і прамысловага абсталявання для бібліятэк падвялі вынікі кангрэса. Вынікам стала рэзалюцыя, якая зафіксавала прынятыя рашэнні па далейшым развіцці бібліятэчнай галіны, рэалізацыі мэт і задач дзяржаўнай культурнай палітыкі.
Арганізатары мерапрыемства – Міністэрства культуры Рэспублікі Беларусь, некамерцыйнае партнёрства "Бібліятэчная асамблея Еўразіі", Нацыянальная бібліятэка Беларусі.
Выказваем словы шчырай павагі і ўдзячнасці арганізатарам, а таксама партнёрам Міжнароднага кангрэса – Міждзяржаўнаму фонду гуманітарнага супрацоўніцтва дзяржаў – удзельніц СНД, СААТ "Камунарка", ЗАТ "Мінскі завод безалкагольных напояў"!
Матэрыял пададзены аддзелам сувязей з грамадскасцю.