У дар Нацыянальнай бібліятэцы Беларусі перададзены кнігі з Тэатральнай бібліятэкі Санкт-Пецярбурга падчас яе наведвання ўдзельнікамі праекта “Нашы бібліятэкі: руская мова як родная”.
Фонд беларускай скарбніцы ведаў папоўніцца пяццю выданнямі:
“Санкт-Петербургская государственная театральная библиотека: 1756–2021” – буклет пра гісторыю і багатыя фонды бібліятэкі.
“Театр в России в эпоху Отечественной войны” – дадзенае выданне з’яўляецца рэпублікацыяй манаграфіі У.М. Усеваладскага-Гернгроса, якая ўбачыла свет у 1912 г. і даўно стала бібліяграфічнай рэдкасцю. Новае выданне забяспечана паказальнікамі і падрабязнымі каментарыямі, якія ўдакладняюць аўтарскія заўвагі.
“Известная и неизвестная эстрада конца XIX – начала XX века” – каталог фонду цэнзуры твораў для эстрады Санкт-Пецярбургскай тэатральнай бібліятэкі за 1846–1917 гг., якія захоўваюцца ў аддзеле рукапісаў і рэдкіх кніг. Каталог змяшчае апісанне 948 дакументаў – рэпертуарных зборнікаў і асобных нумароў на рускай і часткова ўкраінскай і польскай мовах. Дадатак да каталога змяшчае ўзоры эстрадных нумароў з гэтай калекцыі.
“Театральное наследие России” – юбілейнае двухтомнае выданне Санкт-Пецярбургскай дзяржаўнай тэатральнай бібліятэкі.
Выданні адрасаваны гісторыкам тэатра, мастацтвазнаўцам, літаратуразнаўцам.
Матэрыял падрыхтаваны ўдзельніцай праекта Вольгай Палунчанкай, галоўным бібліёграфам АДІА НББ.