А 19-й гадзіне адбылося тэатралізаванае адкрыццё Бібліяночы-2018 “Час пайшоў!”. А вы пайшлі сёлета на Бібліяноч? Калі не, даведайцеся, што зараз адбываецца на тэматычных пляцоўках у Нацыянальнай бібліятэцы.
Жадаючыя здзейсніць скачок у часе і ахапіць усё і адразу адправіліся на экскурсію “NLB-радыус: паралелі і мерыдыяны” і экскурсійны travel-фэст “Па прасторах”. Астатнія госці падзяліліся – хто адпачываць, хто весяліцца.
Тыя, хто паспеў стаміцца за гэты кароткі рабочы тыдзень, перамясціліся ў зону “Вінілавы рэлакс”, дзе, адпачываючы, можна ацаніць гук сапраўднага вінілу. У цэлым, для аматараў музыкі сёння сапраўдны бум: толькі скончылася выступленне студэнцкіх хароў “Маладзёжны рэзананс”, як з галерэі “Ракурс” сталі разносіцца “Галасы эпохі”. Тут слухачоў радуюць Андрэй Маркуц і Аліса Селязнёва, Фёдар Жывалеўскі, групы Streetbands і “Бронепаравоз”. І Beatbox таксама тут!
Тыя, каму больш падабаецца рухацца, чым слухаць, сабраліся на пляцоўцы “Рухай час!”. Толькі сёння за адзін вечар можна атрымаць урокі ад профі па народна-бытавых, усходніх, бальных і сучасных танцах.
Аднак не ўсе любяць весяліцца – нехта і ў пятніцкі вечар пасля працы палічыў за лепшае заняцца самапазнаннем на трэнінгах у кампаніі псіхолагаў Таццяны Мацевіч, Аляксандры Кутасавай і Наталлі Саўчанкі і паламаць галаву над віктарынай ад паб-квіза LitERA Quiz.
У “Партале для гульні” шумнымі кампаніямі і нават цэлымі сем’ямі тэстуюць “настолкі” ад Hobby World, тут жа, на першым паверсе, праходзяць сеансы адначасовай гульні ў шахматы і шашкі. Сваім майстэрствам з аматарамі дзеляцца прафесіяналы – міжнародны гросмайстар па шашках Вольга Федаровіч і майстар спорту міжнароднага класа Рэспублікі Беларусь па шашках Дар’я Федаровіч.
Між тым госці майструюць у межах “Арт-тэрыторыі” – плятуць з бісеру, вяжуць, спасцігаюць дэкупаж і асвойваюць лазапляценне; на пляцоўцы “Назад у СССР” настальгуюць па савецкіх часах; у музеі кнігі адукоўваюцца, а некаторыя нават глядзяць на ноч першы беларускі фільм жахаў! Але гэта толькі для дарослых!
У маленькіх сёлета не толькі свая праграма, але і цэлы дзіцячы паверх! Так-так, менавіта таму на трэцім было (!) асабліва шумна. Тут чым толькі ні займаліся: і малявалі, і спявалі караоке, і майстравалі вырабы, а яшчэ хімічылі разам з музеем навукі “Элемента”, глядзелі жывую батлейку дзіцячага тэатра ДШМ № 2 г. Мінска і надзімалі гіганцкія мыльныя бурбалкі. Аднак з 21.00 стала цішэй – усё ж “НеДзіцячы час”, і дзеткі з бацькамі, бабулямі і дзядулямі адправіліся адпачываць.
А для моладзі і старэйшых гасцей Бібліяноч працягваецца, і гэта не можа не радаваць! Да таго ж нагадаем, што за акном у самым разгары вясна, – чым не “Час кахаць”?! Тым больш што на 22-м паверсе столькі выдатнай рамантычнай (і не толькі!) музыкі ад Віктара Барадзіна, Макса Бурынскага, груп SDL і Karandashis.
Дзякуй усім, хто прыйшоў і бавіць гэты вечар тут, у NLB, разам з намі! Прыемных эмоцый і незабыўнай Бібліяночы!