У студзені – лютым беларуская дэлегацыя спецыялістаў у галіне бібліятэчнай справы наведала Злучаныя Штаты Амерыкі. Візіт быў ажыццёўлены ў рамках праграмы Дзярждэпартамента ЗША “Амерыканскія бібліятэкі”.
За тры тыдні знаходжання адбылося трыццаць пяць прафесійных сустрэч у пяці штатах: Джорджыя, Вашынгтон, Нявада, Мінесота, Нью-Ёрк.
У складзе дэлегацыі былі дырэктар Маладзечанскай цэнтральнай раённай бібліятэкі імя Максіма Багдановіча Марыя Ляцяга, загадчыца аддзела замежнай літаратуры Гродзенскай абласной навуковай бібліятэкі імя Яўхіма Карскага Ларыса Лотыш, загадчыца навукова-даследчага аддзела бібліятэказнаўства Нацыянальнай бібліятэкі Беларусі Марына Пшыбытка, галоўны бібліятэкар Рэспубліканскай навукова-тэхнічнай бібліятэкі Павел Усцінаў, бібліятэкар Баранавіцкай цэнтральнай гарадской бібліятэкі імя Валянціна Таўлая Вольга Якубовіч і дэкан факультэта інфармацыйна-дакументных камунікацый Беларускага дзяржаўнага ўніверсітэта культуры і мастацтваў Мікалай Яцэвіч.
Падчас усёй паездкі Марына Пшыбытка вяла дарожныя нататкі. Некаторыя з іх прапанаваны да ўвагі чытачоў нашага партала.
Штат Джорджыя
Дзень 1-шы ў Атланце падарыў нам добрае надвор’е і шмат цікавых сустрэч. Наведалі дэпартамент па адукацыі штата Джорджыя, а таксама публічную бібліятэку Атланты, у якой адчулі, што насамрэч азначае прынцып агульнадаступнасці. Гэта калі бібліятэку могуць наведваць абсалютна ўсе, у тым ліку і людзі без вызначанага месца жыхарства.
Цікавым падаўся праект “Бібліятэка насення”, які рэалізуецца ў гэтай бібліятэцы. Сутнасць яго складаецца ў неардынарным спосабе заахвочвання чытачоў да наведвання бібліятэкі – упакоўкі насення, атрыманыя ў дар, бібліятэкары раскладваюць у пакуначкі і бязвыплатна раздаюць чытачам.
***
Дзень 2-гі. Амерыка не перастае здзіўляць сваімі кантрастамі. Але самае яркае ўражанне дня сённяшняга – жыхары мястэчка Вітэсбург, размешчанага за 50 міль ад Атланты. Па нашых мерках – гэта сельскі населены пункт з насельніцтвам 600 чалавек.
Першае, што захапіла, калі мы сталі пад’язджаць да бібліятэкі – прывітальны шчыт каля дарогі. Для нас гэта было настолькі нечакана, што мы выскачылі з машыны і пачалі фатаграфавацца. Я ж для сябе зрабіла выснову, што гасціннасць сельскіх бібліятэкараў – рыса інтэрнацыянальная. Дарэчы сказаць, у бібліятэцы нас чакаў абед і яшчэ адзін прывітальны плакат.
Але самае вялікае здзіўленне яшчэ мела быць. Аказваецца, бібліятэка гэта была пабудавана на сродкі мясцовых жыхароў. У іх не было сваёй бібліятэкі, да найбліжэйшай – 13 міль. Каб выправіць становішча, у 2008 г. яны стварылі “Таварыства сяброў бібліятэкі” (праўда, спачатку яно называлася “Таварыства сяброў будучай бібліятэкі”) і пачалі збіраць сродкі на будаўніцтва. І ў іх усё атрымалася. На набыццё фонду мэрыя вылучыла пэўныя сродкі. А цяпер, каб забяспечыць новыя паступленні, мясцовыя жыхары прынеслі ўласныя кнігі і стварылі кнігарню пры бібліятэцы. Купляюць кніжкі, чытаюць і часцей за ўсё зноў вяртаюць у бібліятэку. Такі платны буккросінг. На ўтаргаваныя сродкі купляюць новую літаратуру. Асабіста мяне ўся гэта гісторыя вельмі кранула, як і мясцовыя жыхары, якія прыйшлі ў бібліятэку, каб павітаць нас.
***
Дзень 3-ці, апошні ў Атланце. Заўтра ляцім у Вашынгтон. Фінальны акорд гэтай часткі праграмы запомніцца назаўжды, таму што нам пашчасціла прыняць удзел у зімовай канферэнцыі Амерыканскай бібліятэчнай асацыяцыі. Вельмі маштабнае мерапрыемства, як па працягласці (шэсць дзён), пляцоўцы, на якой усё адбывалася, так і па колькасці дакладаў і прэзентацый, што прагучалі – звыш 900. Некаторыя рабочыя дні канферэнцыі пачыналіся ў 7 гадзін раніцы, а заканчваліся ў 10 гадзін вечара. Каб толькі бегла азнаёміцца з выстаўкай, на якой былі прадстаўлены найноўшыя дасягненні ў выдавецкай сферы, бібліятэчнай справе, інфармацыйных тэхналогіях, нам спатрэбілася больш за тры гадзіны.
Працяг будзе...
