З 14 сакавіка па 5 красавіка ў зале дакументаў міжнародных арганізацый (пам. 207g) адкрыта выстаўка “Супрацоўніцтва з мэтай эканамічнага развіцця”, прысвечаная 70-годдзю ўтварэння Еўрапейскай эканамічнай камісіі (ЕЭК ААН).

Еўрапейская эканамічная камісія ААН – гэта адна з пяці рэгіянальных камісій Арганізацыі Аб’яднаных Нацый. Яна была заснавана Эканамічным і сацыяльным саветам ААН (ЭКАСАС) 28 сакавіка 1947 года па рашэнні Генеральнай Асамблеі ААН з мэтай развіцця эканамічнай дзейнасці і ўмацавання эканамічных сувязей унутры рэгіёна ЕЭК і паміж гэтым рэгіёнам і астатнім светам.

У 1951 годзе ЕЭК набыла статут пастаяннага органа ААН. Членамі Камісіі з’яўляюцца 56 краін: усе еўрапейскія дзяржавы, закаўказскія і сярэднеазіяцкія краіны (Азербайджан, Арменія, Грузія Казахстан, Кіргізія, Таджыкістан, Туркменістан, Узбекістан), а таксама ЗША, Канада, Ізраіль. У яе рабоце маюць права браць удзел у якасці назіральнікаў ці кансультантаў прадстаўнікі любой краіны – члена ААН, а таксама прадстаўнікі міжурадавых і міжнародных арганізацый.

Вышэйшым кіраўнічым органам ЕЭК з’яўляецца сесія Камісіі. Сесіі праходзяць раз у два гады. У міжсесіённы перыяд кіраўніцтва дзейнасцю Камісіі ажыццяўляе Выканаўчы камітэт, які ўключае прадстаўнікоў усіх краін – членаў. ЕЭК і яе органы абслугоўвае Сакратарыят, які ўзначальваецца выканаўчым сакратаром. З 9 ліпеня 2014 года гэтую пасаду займае Крысціян Фрыіс Бах (Данія). Штаб-кватэра ЕЭК ААН знаходзіцца ў Жэневе (Швейцарыя). Гадавы бюджэт складае каля 50 млн долараў ЗША.

Мэты Еўрапейскай эканамічнай камісіі ААН:

садзейнічанне развіццю і ўмацаванню эканамічных адносін як паміж дзяржавамі-членамі, так і паміж імі і іншымі краінамі;
каардынацыя навукова-тэхнічнага і гандлёва-эканамічнага супрацоўніцтва ў рэгіёне;
супрацоўніцтва ў такіх галінах, як навука і тэхніка, эканамічнае прагназаванне і планаванне, гандаль, навакольнае асяроддзе, энергетыка, асобныя галіны прамысловасці, транспарт, сельская гаспадарка, статыстыка, стандартызацыя і сертыфікацыя;
ажыццяўленне збору, аналізу і распаўсюджвання інфармацыі і статыстычных звестак па эканамічных і тэхналагічных пытаннях.

Уся практычная дзейнасць ЕЭК ажыццяўляецца Канферэнцыяй еўрапейскіх статыстыкаў і сямю галіновымі Камітэтамі: па экалагічнай палітыцы, унутраным транспарце, устойлівай энергетыцы, гандлі, лесаматэрыялах, жыллёвай гаспадарцы і землекарыстанні, эканамічным супрацоўніцтве і інтэграцыі.

Рэспубліка Беларусь паўнапраўны член ЕЭК ААН з моманту яе стварэння ў 1947 годзе. Супрацоўніцтва ажыццяўляецца на працягу ўсяго перыяду дзейнасці арганізацыі. Каля 70 беларускіх дэлегацый штогод удзельнічаюць у пасяджэннях рабочых груп, сесіях, канферэнцыях і іншых мерапрыемствах ЕЭК ААН, што дазваляе прадстаўляць пазіцыю беларускага боку на міжнароднай арэне і выпрацоўваць нароўні з іншымі краінамі рашэнні па актуальных агульнаеўрапейскіх эканамічных праблемах.

Прапанаваная чытачам выстаўка налічвае звыш 80 дакументаў. Вялікую частку экспазіцыі складаюць дакументы ЕЭК ААН на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.

Экспазіцыя ўключае наступныя тэматычныя раздзелы:

Гісторыя стварэння, мэты і функцыі ЕЭК ААН.
Асноўныя кірункі дзейнасці ЕЭК ААН.
ЕЭК ААН і міжнароднае эканамічнае супрацоўніцтва.
ЕЭК ААН і Рэспубліка Беларусь.

Выстаўка будзе цікавая студэнтам, магістрантам, выкладчыкам эканамічных дысцыплін, палітычным і грамадскім дзеячам, эколагам, спецыялістам у галіне прамысловай вытворчасці і сусветнай эканомікі, міжнароднага права, сусветнай палітыкі і міжнародных адносін.

Карысныя спасылкі

Супрацоўніцтва з мэтай эканамічнага развіцця

Інфармацыйныя рэсурсы

Паслугі