19 мая ў галерэі “Панарама” адбылося адкрыццё фотавыстаўкі “Птушкі Палесся”. Выстаўка дзейнічае ў межах праекта “Палессе – дзікая прырода без межаў”, які працуе дзеля захавання дзікага асяроддзя аднаго з найвялікшых прыродных ландшафтаў Еўропы.
Арганізатары экспазіцыі – Нацыянальная бібліятэка Беларусі, грамадскае аб’яднанне “Ахова птушак Бацькаўшчыны”, Беларускі клуб фатографаў дзікай прыроды.
“Птушкі Палесся” – своеасаблівае падарожжа бёрдвотчараў-аматараў (людзей, захопленых назіраннем за птушкамі) і прафесійных арнітолагаў. У самай высока размешчанай галерэі Мінска сабраны фотаздымкі птушак Палесся і натуральнага для іх наваколля. Без бінокляў, спецыяльных прыстасаванняў, не выязджаючы з Мінску, можна з захапленнем “паназіраць” за палётам і паўсядзённым жыццём палескіх птушак: куліка-цякуна і белай сініцы, вялікага грыцука і драча, звычайнага рэмеза, барадатай кугакаўкі і чорнага бусла, а таксама пабачыць неабсяжныя прасторы Прыпяці, раку Сцвігу, пясчаныя дзюны ў Лельчыцкім раёне.
Аўтары работ – вядомыя беларускія фатографы Мікалай Верабей, Андрэй Шэўчык, Павел Лычкоўскі, Уладзімір Пакалевіч, Віктар Казлоўскі, Арцём Турлай, Васіль Фядосенка і Сяргей Козак. У экспазіцыі – 20 фотаздымкаў-партрэтаў палескіх птушак і 20 фотаздамкаў-пейзажаў асяродзя іх існавання, на якіх можна ўбачыць яркае апярэнне птушак, іх уважлівыя вочкі, жывапісныя пёры, моцныя крылы, выразныя палёты, а таксама шмат прыродных сюжэтаў.
Распачалося адкрыццё выставачнага праекта з прывітальнага слова першага намесніка генеральнага дырэктара Нацыянальнай бібліятэкі Беларусі Алены Далгаполавай. У мерапрыемстве прынялі ўдзел арнітолаг, бёрдвотчар, прыродаахоўнік, дырэктар грамадскага аб’яднання “Ахова птушак Бацькаўшчыны” Аляксандр Вінчэўскі і спецыяліст па камунікацыях гэтага аб’яднання Аліна Ляпёшкіна. Выступоўцы нагадалі пра чараўніцтва зямной бязважкасці Палесся, яскравую разнастайнасць птушак, якіх няма ў замежных краінах, і пра найважнейшыя абавязацельствы чалавека – абараняць і захоўваць усё тое, што разам з намі з’яўляецца часткай шматграннага жыцця на зямлі.
Запрашаем праз прызму фотаздымкаў пазнаёміцца з багатым светам беларускага крылатага Палесся.
Кошт наведвання экспазіцыі ўваходзіць у кошт наведвання агляднай пляцоўкі.
Выстаўка працуе да 22 жніўня 2021 г.
Дата яе заканчэння можа быць зменена.
Тэлефон для даведак: (8 017) 368 37 37.
E-mail: pr@nlb.by
Матэрыял пададзены аддзелам сувязей з грамадскасцю.
