Дата правядзення
Час правядзення
Месца правядзення
19 мая а 17-й гадзіне ў галерэі “Панарама” (22-гі паверх) адкрылася фотавыстаўкі “Птушкі Палесся”.
Выстаўка дзейнічае ў межах праекта “Палессе – дзікая прырода без межаў”, які працуе дзеля захавання дзікага асяроддзя аднаго з найвялікшых прыродных ландшафтаў Еўропы.
Арганізатары экспазіцыі – Нацыянальная бібліятэка Беларусі, грамадскае аб’яднанне “Ахова птушак Бацькаўшчыны”, Беларускі клуб фатографаў дзікай прыроды.
Выстаўка “Птушкі Палесся” расказвае аб разнастайнасці і багацці беларускай прыроды. Галоўная мэта – прыцягнуць увагу да ўнікальных відаў птушак, нагадаць гледачу пра прыгажосць беларускага палескага асяроддзя, звярнуць увагу да праблем экалагічнага стану, відавай разнастайнасці і зацікавіць сучасным экалагічным хобі – бёрдвотчынгам (birdwatching).
Экспазіцыя – своеасаблівае падарожжа па Палессі з фотаздымкамі-партрэтамі палескіх птушак і фотаздымкамі-пейзажамі асяродку іх існавання. Аўтары работ – вядомыя беларускія фатографы Мікалай Верабей, Андрэй Шэўчык, Павел Лычкоўскі, Уладзімір Пакалевіч, Віктар Казлоўскі, Арцём Турлай, Васіль Фядосенка і Сяргей Козак.
Убачыць чорнага бусла альбо барадатую кугакаўку, навучыцца адрозніваць як мага больш відаў птушак, зведаць іх звычкі і іншыя асаблівасці, палюбавацца ўнікальнай разнастайнасцю крылатых жыхароў Палесся – усё гэта можа зрабіць бёрдвотчар падчас наўмыснага падарожжа і наведвальнікі выстаўкі “Птушкі Палесся” падчас візіту ў бібліятэку.
На адкрыццё ўваход вольны, у астатні час наведванне экспазіцыі ўваходзіць у кошт наведвання агляднай пляцоўкі.
Выстаўка будзе працаваць да 22 жніўня 2021 г..
Дата яе заканчэння можа быць зменена.
Тэлефон для даведак: (8 017) 368 37 37.
E-mail: pr@nlb.by