20 верасня ў музеі кнігі адкрылася міжнародная выстаўка “Беларусь і Біблія”, прысвечаная самай вядомай і ўплывовай кнізе ў гісторыі чалавецтва.
Упершыню ў рамках адной экспазіцыі ў нашай краіне дэманструюць каштоўныя рарытэты, узрост якіх дасягае 5 тысяч гадоў. У бібліятэку яны прыбылі з Вялікабрытаніі, ЗША, Ізраіля, Карэі, са шматлікіх прыватных калекцый.
Арганізатарамі выстаўкі сталі Нацыянальная бібліятэка Беларусі і некамерцыйная арганізацыя “Група даследавання рукапісаў” (ЗША).
Ва ўрачыстай цырымоніі адкрыцця прынялі ўдзел дырэктар Нацыянальнай бібліятэкі Беларусі Раман Матульскі, намеснік міністра культуры Рэспублікі Беларусь Аляксандр Яцко, першы прарэктар Інстытута тэалогіі імя святых Мяфодзія і Кірыла Беларускага дзяржаўнага ўніверсітэта протаіерэй Сяргей Гардун, арцыбіскуп Мінска-Магілёўскі, мітрапаліт Тадэвуш Кандрусевіч, дырэктар Групы даследавання рукапісаў (ЗША) Скот Кэрал. Сярод запрошаных былі прадстаўнікі органаў дзяржаўнага кіравання, дыпламатычных місій, кіраўнікі і прадстаўнікі ўстаноў культуры, адукацыі, грамадскіх арганізацый, вядомыя вучоныя і іншыя зацікаўленыя асобы.
Гасцей выстаўкі пазнаёмілі з сапраўды ўнікальнымі экспанатамі:
- арыгінальным рукапісам “бібліі Антычнасці” – “Іліядай” Гамера – папірусам на грэчаскай мове, напісаным яшчэ да нашай эры;
- арыгіналамі гравюр на біблейскія сюжэты Альбрэхта Дзюрэра, Сальвадора Далі і іншых знакамітых мастакоў;
- скруткамі Мёртвага мора (2 тыс. гадоў), якія захоўваюць самыя раннія тэксты большасці кніг Старога Запавету;
- арыгіналамі Біблій Гутэнберга, Лютара і Скарыны;
- найстаражытнейшымі фрагментамі Новага Запавету (2–3 стст. н.э.);
- біблейскімі рукапісамі на старажытных мовах: грэчаскай, лацінскай, копцкай, самарыцянскай, армянскай, індыйскай, кітайскай і інш.;
- першадрукамі кніг многіх народаў і краін, першымі перакладамі Бібліі на нацыянальныя мовы, у тым ліку – на беларускую;
- старажытнымі беларускімі біблейскімі рукапісамі і старадрукаванымі кнігамі.
Падчас выстаўкі будуць працаваць аніматары з розных краін. Прыемным бонусам для наведвальнікаў стане магчымасць асвоіць друк на варштатце часоў Гутэнберга, а таксама пабываць у рукапіснай майстэрні. Для дзяцей арганізаваны “Клуб кніжных прафесараў”, а для дарослых прадугледжаны навуковыя лекторыі ад знакамітых замежных і беларускіх даследчыкаў.
Трапіць на выстаўку можна па чытацкім білеце Нацыянальнай бібліятэкі Беларусі, пропуску “Сацыякультурны цэнтр” і ў складзе экскурсійнай групы.
Выстаўка будзе працаваць у музеі кнігі (пам. 347) да 21 кастрычніка 2018 г.
Телефоны для даведак: (8 017) 293 27 22, 293 28 85.
Е-mail: pr@nlb.by
Глядзіце таксама відэасюжеты тэлеканалаў і наш фотарэпартаж аб адкрыцці міжнароднай выстаўкі "Беларусь і Біблія":
- Национальная библиотека Беларуси отмечает посетительский рекорд (Беларусь 1)
- "Беларусь і Біблія": пра выстаўку-сенсацыю расказалі ў праграме "Добрай ранiцы, Беларусь!" (Беларусь 1)
- Новый Завет в ¼ см и папирусы из мумий: уникальные и дорогие экспонаты представлены на выставке в Минске (СТВ)
- Галоўны помнік цывілізацыі: у Нацыянальнай бібліятэцы адкрылася ўнікальная экспазіцыя "Беларусь і Біблія" (СТВ)
- Выстаўка "Беларусь і Біблія" адкрываецца ў Мінску (Sputnik)
- Рэдкія экзэмпляры Бібліі прадставілі ў Нацыянальнай бібліятэцы (ОНТ)
- Біблія – помнік цывілізацыі: у Мінску паказалі 200 унікальных манускрыптаў (Мир 24)
