23 лютага ў Нацыянальнай бібліятэцы Беларусі адбылася публічная лекцыя “Аператыўныя і выведвальныя зводкі Беларускага штаба партызанскага руху”, прымеркаваная да Года гістарычнай памяці.
Экспертам па тэме выступіў кандыдат гістарычных навук, загадчык аддзела публікацый Нацыянальнага архіва Рэспублікі Беларусь, аўтар больш за 160 навуковых публікацый, спецыяліст па гісторыі і крыніцазнаўстве Вялікай Айчыннай вайны Святаслаў Кулінок.
На лекцыі быў дадзены агульны агляд партызанскіх фондаў Нацыянальнага архіва і працэсу зараджэння і фарміравання справаздачных дакументаў, зроблены акцэнт на самых цікавых факталагічных матэрыялах у змесце гэтых дакументаў і на гісторыі і кіраўніцтве Беларускага штаба партызанскага руху.
Як адзначыў Святаслаў Валянцінавіч, раней аператыўныя і выведвальныя зводкі Беларускага штаба партызанскага руху знаходзіліся пад грыфам “абсалютна сакрэтна”, а цяпер даступныя для шырокага кола карыстальнікаў і даследчыкаў. У іншых краінах гэтыя дакументы засакрэчаны і цяпер.
На мерапрыемстве таксама абмеркавалі і дыскусійныя пытанні: дыверсантаў з Іспаніі ў беларускіх лясах, вярбоўку нямецкіх спецслужбаў у шпіёнскія школы, асаблівасці і ўнікальнасць корпуса справаздачных дакументаў Беларускага штаба партызанскага руху, справаводства і дакументазварот у фарміраваннях “лясных салдат” і кіруючым штабе.
Наступная лекцыя “Камуністычная партыя Заходняй Беларусі: людзі і справы” адбудзецца 2 сакавіка а 15-й гадзіне. Экспертам выступіць кандыдат гістарычных навук, дацэнт кафедры гісторыі Беларусі, археалогіі і спецыяльных археалагічных дысцыплін Гродзенскага дзяржаўнага ўніверсітэта Аляксандр Горны.
Лекцыі ладзяцца ў адкрытым для публікі фармаце. Кожная сустрэча прысвечана адной з важных старонак нашай мінуўшчыны, якая раскрываецца на прыкладзе гістарычных крыніц – летапісаў, рукапісных кніг, старадрукаў, даўніх карт, гравюр, падпольных і партызанскіх выданняў часоў вайны, твораў беларускай літаратуры і іншых крыніц, якія захоўваюць гістарычную памяць беларускага народа.
Далучыцца да адукацыйных лекцый можна і падчас прамой трансляцыі на платформе YouTube па адрасе: https://www.youtube.com/channel/UCU6ThQA9RX5hGdZzCvMsZqw.
Уваход на лекцыі вольны.
Тэлефон для даведак: (8 017) 293 28 81.
Матэрыял пададзены аддзелам сувязей з грамадскасцю.