4 снежня 2008 года ў галерэі “Ракурс” Нацыянальнай бібліятэкі Беларусі адбылося ўрачыстае адкрыццё мультыпраета “Universum”.
Асноўнай мэтай праекта было выяўленне шматгранных талентаў у мастацкім асяроддзі Беларусі.Таму ўсім, хто выставіў свае мастацкія творы на суд гледача, было неабходна заявіць пра сябе яшчэ і ў шоу-сферы.
У час урачыстага адкрыцця ўсе аўтары-ўдзельнікі мультыпраета прадэманстравалі сваё музычнае майстэрства. Пасля адбылося адкрыццё мастацкай выстаўкі, на якой былі прадстаўленыя каля 160 работ, выкананых удзельнікамі музычнай праграмы ў розных тэхніках: графіка, жывапіс, прыкладное мастацтва, інсталяцыя, фота.
Экспазицыі праекта размясціліся ва ўсіх трох галерэях - «Ракурс», «Лабірынт» і «Атрыум». Прадстаўленыя пейзаж, партрэт, тэматычныя кампазіцыі, інсталяцыя, выцінанкі, калаж.
Сярод удзельнікаў музычнай праграмы і выстаўкі аказаліся такія папулярныя групы, як «ПАЛАЦ», «ХОРЦІЦА», «ДЗІВАСІЛ» і «НАГУАЛЬ», а таксама асобныя выканаўцы – графік і бард Аляксей Ляпін; вядомы мастак, калекцыянер і рок-музыкант Андрэй Плясанаў; архітэктар, паэт і кампазітар Станіслаў Федчанка; піяніст-канцэртмайстар, член Саюза кампазітараў і Саюза мастакоў Усевалад Грыцкевіч; мастак, музыкант, канцэртмайстар Акадэміі музыкі Наталля Капшай-Міронава; паэт, графік і аўтар танцавальна-пластычных перформансаў Вольга Дворнікава.
У мерапрыемстве прынялі ўдзел начальнік сацыякультурнага цэнтра Нацыянальнай бібліятэкі Беларусі С.І. Шарамецьеў, загадчык аддзела галерэйна-выставачнай дзейнасці Ф.А. Ястраб, член Саюза кампазітараў і Саюза мастакоў У.Грыцкевіч.
Праект аказаўся не толькі вельмі паспяховым, але і шматабяцальным: з наступнага года плануется значна пашырыць геаграфію конкурса за кошт удзельнікаў з Італіі, Венгрыі, Германіі, Польшчы і іншых дзяржаў.