22 лістапада ў галерэі “Мабільная” адбылося адкрыццё фотавыставы “Беларускі погляд Даўгаўпілса”, арганізаванай Нацыянальнай бібліятэкай Беларусі і Рэспубліканскім цэнтрам нацыянальных культур.
Намеснік генеральнага дырэктара Нацыянальнай бібліятэкі Беларусі Таццяна Кузьмініч павітала прысутных, нагадала аб цёплых адносінах бібліятэкі з латвійскімі калегамі і беларускай дыяспарай і падзякавала за супрацоўніцтва ў сферы культурных і навуковых праектаў.
Першы намеснік старшыні Даўгаўпілскай гарадской думы Аляксей Васільеў распавёў аб насычаным культурным жыцці латвійскага Даўгаўпілса і падкрэсліў, што экспазіцыя якраз і адлюстроўвае прыгажосць і жыццё гэтага горада.
Малады фотамастак і аўтар выставы Эдуард Літвіноўскі распавёў аб асноўнай ідэі экспазіцыі, падзяліўся гісторыяй яе стварэння і адзначыў немалаважнае значэнне як для беларусаў нашай краіны, так і беларусаў замежжа.
Кіраўнік беларускага Даўгаўпілскага цэнтра беларускай культуры “Уздым” Жанна Раманоўская і кіраўнік упраўлення культуры Элеанора Кляшчынская падзякавалі арганізатарам і ўручылі памятныя латвійскія сувеніры.
Таццяна Кузьмініч выказала надзею на працяг цеснага супрацоўніцтва і перадала ў дар латвійскаму боку факсімільнае выданне “Буквар”.
Экспазіцыя “Беларускі погляд Даўгаўпілса” знаёміць з відамі горада і яго ваколіц, дэманструе багацце і разнастайнасць беларускага нацыянальнага касцюма, прадстаўляе беларусаў Латвіі ў нацыянальных касцюмах на фоне ўрбаністычных і прыгарадных пейзажаў у розныя поры года.
Выстава падтрымлівае дыялог паміж аўтарам і гледачом: распавядае аб культурнай памяці і беражлівым захаванні традыцый, неабходных і значных для іх носьбітаў.
Мерапрыемства прайшло ў рамках творчай стажыроўкі для кіраўнікоў замежных беларускіх непрафесійных калектываў мастацкай творчасці і старшыняў грамадскіх аб’яднанняў беларусаў замежжа ў Беларусі, арганізаванай Міністэрствам культуры Рэспублікі Беларусь.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Выстава будзе працаваць па 28 лістапада 2021 г. у галерэі “Мабільная” (3-ці паверх).
Дата яе заканчэння можа быць зменена.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.
