20 лютага ў бібліятэцы адкрылася міжнародная выстаўка “Дзень восьмы”. Арганізатары праекта – Нацыянальная бібліятэка Беларусі і міжнароднае грамадскае аб'яднанне “Саюз майстроў-міратворцаў «Святло»”.
Прайшлі дні тварэння і адпачынку. І настаў дзень восьмы – дзень прыняцця адказнасці, сумеснай працы для стварэння жыццесцвярджальнай мадэлі нашага свету і ўласнага лёсу. Кожны ўчынак, слова, думка ўзаемазвязаны тысячамі прычынна-следчых сувязяў з іншымі людзьмі і, падобна кругам на вадзе ад кінутага каменя, аказваюць уплыў на ўсе падзеі нашай рэальнасці. Як мы праяўляем сябе ў гэтым свеце, такім ён і становіцца, і калі мы жадаем змяніць нешта ў ім – пачаць варта з сябе.
Гэтую важную думку адлюстравалі ў сваіх працах удзельнікі выставачнага праекта “Дзень восьмы” – беларускія майстры сучаснага выяўленчага і дэкаратыўна-прыкладнога мастацтва, а таксама мастакі з Расіі і Казахстана. Фотапрынты, батык, жывапіс, берасцяныя аплікацыі – кожная з работ нясе свой пасыл і адлюстроўвае глыбіннае стаўленне аўтара да навакольнага свету.
У экспазіцыі таксама прадстаўлены работы выхаванцаў Рэспубліканскага рэабілітацыйнага цэнтра для дзяцей-інвалідаў. Насычаныя колерам, яркія і разнастайныя па тэхніцы выканання, яны нагадваюць дарослым пра дзіўныя здольнасці дзяцей тонка адчуваць гэты свет і бачыць яго прыгажосць, нягледзячы на знешнія абставіны.
У мерапрыемстве прынялі ўдзел загадчыца аддзела галерэйна-выставачнай дзейнасці Нацыянальнай бібліятэкі Беларусі Вольга Давідовіч, куратар выстаўкі, намеснік старшыні Саюза майстроў-міратворцаў “Святло” Алеся Іназемцава і загадчыца кафедры дэкаратыўна-прыкладнога мастацтва Беларускай дзяржаўнай акадэміі мастацтваў, член Беларускага саюза мастакоў і Саюза майстроў- міратворцаў “Святло” Аляксандра Дзятлава.
Сапраўдным упрыгожаннем вернісажу сталі творчыя нумары юных таленавітых артыстаў Ганны Дзік, Соф'і Хадневіч, Ліліі Хацкевіч, Алега Кручыніна, Алены Машкоўскай і Данііла Асновіча.
Убачыць работы ў стылі “гармоніі і дабра” можна ў галерэі “Лабірынт” (3-ці паверх) да 12 красавіка 2018 года.
Дата заканчэння працы выставы можа быць зменена.
Тэлефон для даведак: (8 017) 266 37 37.
Е-mail: pr@nlb.by