З 22 лютага у Нацыянальнай бібліятэцы працуе выстава “Фестываль пейзажа”, прысвечаная 150-годдзю з дня нараджэння Вітольда Бялыніцкага-Бірулі (1872–1957).
Фестываль пейзажа – даніна пашаны вядомаму мастаку, найбуйнейшаму беларускаму пейзажысту, што стварыў сапраўдную пейзажную галерэю вобразаў беларускай прыроды.
Невыпадкова экспазіцыя пачынаецца з палатна “Майстэрня В. Бялыніцкага-Бірулі ў сядзібе «Чайка»” Алены Дзедавай. З гэтай сядзібай звязана вялікая частка творчага і асабістага жыцця майстра. Яе наваколле стала невычэрпнай крыніцай матываў для творчасці мастака. Там жа і закончылася доўгае, насычанае падзеямі і няпростае жыццё творцы.
Выдатныя краявіды, выкананыя ў традыцыйнай манеры, напаўняюць прастору галерэі адчуваннем сонца, холаду, снегу, марознага паветра. Лірычны і стрыманы, сугучны спакойнаму каларыту беларускай прыроды жывапіс Уладзіміра і Паўла Масленікавых; цёплы і празрысты, падобны на акварэль гарадскі пейзаж Васіля Пешкуна; трапяткія драўляныя хаткі Наталлі Шапавалавай і Міхаіла Крота. Рэалістычныя карціны Антона Вырвы вылучаюцца асаблівай тонкасцю, мяккасцю і глыбінёй успрымання і перадачы зімовага, веснавога і летняга наваколля. Нечаканым кантрастам на іх фоне выступаюць сакавітыя пейзажы Юліі Мацура.
Многім палотнам на выставе ўласцівы вобразна-паэтычны пачатак, мелодыка танальных спалучэнняў, філасофскае асэнсаванне натуральных матываў. Пейзажы Алы Страуты, Святланы Рыжыкавай, Веры Каўзановіч, Сяргея Пісарэнкі, Уладзіміра Рынкевіча адметныя індывідуальнасцю і філасофскай змястоўнасцю.
Адметная індывідуальная манера, цікавыя кампазіцыйныя рашэнні, выразная пластыка – гэта тыя рысы, што адрозніваюць абсалютную большасць прадстаўленых твораў і вызначаюць мастацкі ўзровень выставы.
У кожнага пейзажыста свая творчая задача, аднак ёсць і тое, што іх аб’ядноўвае, – гэта любоў да жыцця, удзячныя і ўважлівыя адносіны да навакольнага свету.
З 11 лютага па 20 сакавіка ў зале дакументаў па мастацтве (пам. 306) праходзіць кніжна-ілюстрацыйная выстава “Лірычны пейзажыст з Бялыніч”, прысвечаная 150-гадоваму юбілею Вітольда Бялыніцкага-Бірулі.
Выстава працуе ў галерэі “Лабірынт” (3-ці паверх) да 23 мая 2022 г.
Дата яе заканчэння можа быць зменена.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял падрыхтаваны аддзелам галерэйна-выставачнай дзейнасці.
