10 снежня ў галерэі “Ракурс” адбылася прэзентацыя кнігі і адкрыццё фотавыстаўкі Алены Адамчык “Bielaruski. Women of Europe”.
Арганізатарамі мерапрыемства выступілі Міністэрства інфармацыі Рэспублікі Беларусь, Міністэрства культуры Рэспублікі Беларусь, Нацыянальная бібліятэка Беларусі.
Алена Адамчык – вядомы беларускі фотамастак, майстар парадных партрэтаў. У 2004 годзе Алена пачала працу над першым кніжным праектам “Bielaruski”, у які ўвайшлі партрэты нашых суайчынніц.
Прэзентацыя альбома паспяхова прайшла ў Вільнюсе і Лагойску. Затым праект “Bielaruski” перарос у праект “Women of Europe”, які літаральна пакарыў Еўропу. Пасля чарговай прэзентацыі ў Княстве Манака Алена натхнілася на стварэнне наступнага фотаальбома “Women of Monaco”, у якім размясціла партрэты жанчын, вядомых у свеце, сярод іх – Шырлі Бэс, прынцэса Бурбонская Каміла, Моніка Бакардзі, Сафія Аль Рашыд.
Сёлета Алена Адамчык выдала пяты альбом, гераінямі якога сталі вядомыя жанчыны Беларусі, што пражываюць не толькі ў сябе на Радзіме, але і па-за яе межамі. Сярод іх – алімпійская чэмпіёнка Марына Лобач. У кнігу “Bielaruski. Women of Europe” ўвайшло дванаццаць святочных партрэтаў.
Адкрыла вечар фотамастачка Алена Адамчык урачыстай перадачай у дар Нацыянальнай бібліятэцы Беларусі пяці альбомаў з серыі “Bielaruski. Women of Europe” са сваімі аўтографамі.
У мерапрыемстве ўзялі ўдзел першы намеснік кіраўніка Адміністрацыі Прэзідэнта Рэспублікі Беларусь Наталля Пяткевіч, першы намеснік міністра інфармацыі Рэспублікі Беларусь Лілія Ананіч, дырэктар Нацыянальнай бібліятэкі Беларусі Раман Матульскі, прэзідэнт Рускага клуба мастацтва і культуры княгіня Наталля Галіцына, замежныя дыпламаты, дзеячы культуры і мастацтваў.
Выстаўка будзе доўжыцца да 15 снежня ў галерэі “Ракурс”.
 |
 |
 |
 |
 |
 |
 |
 |
 |
