8 снежня 2009 года ў галерэі «Ракурс» Нацыянальнай бібліятэкі Беларусі адбылося ўрачыстае адкрыццё мастацкай выстаўкі «Арт-крок».
Выстаўка з’яўляецца сумесным праектам Нацыянальнай бібліятэкі Беларусі і Міжнароднай гільдыі жывапісцаў.
Больш за 130 работ, выкананых за апошні год, гледачам прадставілі жывапісцы і майстры фотамастацтва. Сярод іх вядомыя мастакі, імены якіх ужо добра знаёмыя беларускаму гледачу, а таксама тыя, хто толькі пачынае свой творчы шлях.
У адкрыцці выстаўкі прынялі ўдзел куратар праекта, загадчык аддзела галерэйна-выставачнай дзейнасці Нацыянальнай бібліятэкі Беларусі, старшыня Міжнароднай гільдыі жывапісцаў Ф.А. Ястраб; беларускі мастак, прафесар, загадчык кафедры дэкаратыўна-прыкладнога мастацтва Беларускага дзяржаўнага універсітэта культуры і мастацтваў У.І. Рынкевіч, кандыдат мастацтвазнаўства, дацэнт кафедры тэорыі і гісторыі Беларускай дзяржаўнай акадэміі мастацтваў Я.Ф. Шунейка; фотамастак, член экспертнай камісіі Беларускага дзяржаўнага аб’яднання «Фотоискусство» В.В. Вядрэнка; мастак, старшы выкладчык Беларускага дзяржаўнага універсітэта Н.А. Рачкоўская.
Музычную кампазіцыю да ўвагі гледачоў прадставіла студэнтка Інстытута сучасных ведаў імя А.М. Шырокава Вольга Нокард.
Выстаўка ладзіцца ў трох галерэях Нацыянальнай бібліятэкі Беларусі («Лабірынт», «Атрыум», «Ракурс») і будзе доўжыцца да 12 студзеня 2010 года.