16 верасня ў Нацыянальнай бібліятэцы Беларусі адбылося адкрыццё фотавыстаўкі “Паралелі” французскага фатографа Цьеры Клеша і беларускіх фатографаў Вольгі Лойкі і Віктара Байкоўскага.
У экспазіцыі прадстаўлены фатаграфіі Парыжа, Мінска, Гродна, Гомеля і іншых гарадоў, аб’яднаных канцэпцыяй адзінства горада і гарадскога жыхара.
Праект, які ўпісвае беларускае мастацтва фатаграфіі ў еўрапейскі кантэкст і спрыяе развіццю міжкультурных сувязей у цэлым і ў галіне фотамастацтва ў прыватнасці, таксама паслужыць базай для новых сумесных ініцыятыў.
У адкрыцці фотавыстаўкі ўзялі ўдзел загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб, мастацтвазнавец Яўген Шунейка, пісьменнік Навум Гальпяровіч, беларускія фатографы Вольга Лойка і Віктар Байкоўскі. З французскім фотамастаком Цьеры Клешам вядучыя вечарыны Юлія Новік і Віка Трэнас правялі інтэрнэт-канферэнцыю.
Выстаўка будзе доўжыцца да 6 кастрычніка ў галерэі “Панарама” (22-і паверх, закрытая аглядная пляцоўка). Плата за ўваход складае кошт наведвання агляднай пляцоўкі Нацыянальнай бібліятэкі Беларусі.
 |
 |
 |
 |
 |
