У зале беларускай літаратуры (пам. 205) праходзіць выстаўка “За радкамі дакументаў”, прысвечаная 80-годдзю з дня нараджэння беларускага літаратуразнаўца, пісьменніка, гісторыка, археографа, архівіста, лаўрэата Дзяржаўнай прэміі імя Я. Коласа (1990) Генадзя Васілевіча Кісялёва (1931–2008).
Нарадзіўся Генадзь Кісялёў 19 сакавіка 1931 года ў г. Каломне Маскоўскай вобласці. За гады сваёй плённай працы ў Расіі, Латвіі і Беларусі вучоны даследаваў жыццё і творчасць К. Каліноўскага, Ф. Багушэвіча, В. Дуніна-Марцінкевіча і інш.
Некалькі дзесяцігоддзяў Генадзь Васілевіч працаваў на ніве пошуку і вяртання імён забытых аўтараў. Так, пасля шматгадовай працы ў айчынных і замежных бібліятэках і архівах ім адшуканы найбольш верагодны аўтар знакамітай паэмы “Тарас на Парнасе”. На думку даследчыка, аўтарам гэтага твора трэба лічыць Кастуся Вераніцына (1834–1904).
Аб ананімных паэмах “Тарас на Парнасе” і “Энеіда навыварат” вучоны напісаў шэраг манаграфій: «Загадка беларускай “Энеіды”» (1971), “Пошукі імя” (1978), “Разыскивается классик...” (1989), “Жылі-былі класікі” (2005).
Выстаўка складаецца з трох раздзелаў.
Першыя два раздзелы – “Плён навуковага пошуку” і “Грунтоўна і ўдумліва” – раскрываюць усю глыбіню і шматграннасць навуковай дзейнасці Г. В. Кісялёва. У іх прадстаўлены кнігі даследчыка і артыкулы з навуковых зборнікаў і перыядычных выданняў.
Трэці раздзел “Слова – багацце” змяшчае матэрыялы пра жыццё і творчасць вучонага і пісьменніка.
На экспазіцыі прадстаўлена больш за 100 дакументаў. Выстаўка працуе з 14 сакавіка па 14 красавіка 2011 г.
Кантактны тэлефон: 293-27-16.
 |
 |
|||||||
 |
 |
