З 24 верасня па 31 кастрычніка ў зале беларускай літаратуры (пам. 205) праходзіць выстаўка “Вялікае Княства Літоўскае: да 770-годдзя з часу ўтварэння (1240-я – 1795 гг.)”.
На выставачных паліцах прадстаўлена больш за 400 дакументаў, прысвечаных Вялікаму Княству Літоўскаму. Пачынаецца экспазіцыя з выданняў, у якіх адлюстраваны дзяржаўна-прававы лад і сістэма кіравання ў ВКЛ. Сярод экспанатаў – дакументы тых часоў: акты, статуты, метрыкі, прывілеі і інш. Тут таксама прадстаўлены шматлікія даследаванні, якія раскрываюць гістарычны шлях дзяржавы, яе духоўнае і культурнае жыццё.
Наведвальнікі выстаўкі маюць магчымасць пазнаёміцца з працамі В. Ластоўскага, У. Ігнатоўскага, У. Пічэты, М. Любаўскага, а таксама з працамі сучасных гісторыкаў С. Рыбчонка, Я. Анішчанкі, А. Краўцэвіча, А. Катлярчука, Г. Сагановіча, М. Ермаловіча, В. Насевіча і інш.
Працягвае экспазіцыю раздзел “Гарады, мястэчкі, замкі ВКЛ”, які змяшчае дакументы пра гістарычную спадчыну, культурнае багацце старажытных беларускіх гарадоў.
Цікавымі будуць і матэрыялы раздзела “Славутыя асобы ВКЛ”, у якім сабраны навуковыя даследаванні, манаграфіі, прысвечаныя вядомым дзеячам гісторыі і культуры: Міндоўгу, Вітаўту, Гедыміну, Ф. Скарыне, С. Буднаму, М. Гусоўскаму і інш.
Завяршае экспазіцыю беларуская мастацкая літаратура пра Вялікае Княства Літоўскае. У раздзел увайшлі творы Я. Чачота, У. Караткевіча, В. Чаропкі, У. Арлова, Л. Дайнекі, В. Іпатавай і інш.
Кантактны тэлефон: 293-27-16.
 |
 |
 |
 |
 |
 |
