З 12 сакавіка па 13 красавіка ў зале дакументаў міжнародных арганізацый (пам. 207g) дэманструецца тэматычная выстаўка “Верша цудоўны тэатр…”, прысвечаная Сусветнаму дню паэзіі.

Гэты Дзень быў абвешчаны на 30-й сесіі Генеральнай канферэнцыі ЮНЕСКА 15 лістапада 1999 года (дакумент 30С/82) і штогод адзначаецца 21 сакавіка.

У адпаведнасці з рашэннем ЮНЕСКА асноўнай мэтай святкавання Сусветнага дня паэзіі з’яўляецца падтрыманне пасродкам паэзіі моўнай разнастайнасці і моў, якія знікаюць. Акрамя таго, гэты Дзень закліканы садзейнічаць развіццю паэзіі, вяртанню да вуснай традыцыі паэтычных чытанняў, выкладанню паэзіі, узнаўленню дыялогу паміж паэзіяй і іншымі відамі мастацтва, такімі, як тэатр, танцы, музыка, жывапіс, а таксама заахвочванню выдавецкай справы і стварэнню ў сродках масавай інфармацыі пазітыўнага вобраза паэзіі як сапраўды сучаснага мастацтва, адкрытага людзям.

“Паэзія, – гаворыцца ў рашэнні ЮНЕСКА, – можа стаць адказам на самыя вострыя і глыбокія духоўныя пытанні сучаснага чалавека, але для гэтага неабходна прыцягнуць да яе як мага больш шырокую грамадскую ўвагу”. Святкаванне гэтага Дня дае штуршок правядзенню розных акцый і іншых мерапрыемстваў у падтрымку паэзіі, якія ажыццяўляюцца на розных узроўнях – міжнародным, нацыянальным, рэгіянальным і мясцовым. Сёння ўжо традыцыйна ў многіх краінах з нагоды Сусветнага дня паэзіі праходзяць літаратурныя вечары, фестывалі, прэзентацыі новых кніг, уручаюцца літаратурныя прэміі. Гэтыя падзеі шырока асвятляюцца СМІ, прыцягваюць увагу не толькі шырокай аўдыторыі, але і выдаўцоў. Заключэнне новых дагавораў на выданне іх твораў становіцца для паэтаў лепшым падарункам да свята і самым чаканым яго вынікам.

Варта адзначыць дэмакратычнасць Сусветнага дня паэзіі, які аб’ядноўвае як масцітых аўтараў з мільённымі тыражамі, так і паэтаў-пачаткоўцаў. Сустракаючыся адзін з адным на святочных мерапрыемствах, яны маюць магчымасць абменьвацца вопытам і зараджацца адзін ад аднаго станоўчай творчай энергіяй.

Слова “паэзія” паходзіць ад грэч. “рoieo” – тварыць, будаваць, ствараць. Дагэтуль невядома, хто стаў першым у свеце аўтарам сапраўднага верша. Па меркаванні вядомага гісторыка Томаса Пікока, самыя старажытныя вершы-гімны былі створаны ў XXIII стагоддзі да нашай эры дачкой шумерскага правіцеля – Энхедуан, якая злажыла гімн, што ўслаўляў багоў, заклаўшы першы камень у стварэнні паэзіі старажытных людзей.

Паэзія – адно з самых геніяльных дасягненняў чалавецтва. Праліваць свае пачуцці ў вершаванай форме, захоўваць у рыфме сваё светаадчуванне, марыць пра будучыню і ўспамінаць мінулае, адначасова звяртаючыся да мільёнаў і застаючыся пры гэтым сам-насам, – на гэта здольная толькі паэзія, найвялікшае з мастацтваў, створаных чалавекам.

Кожны верш унікальны, але кожны адлюстроўвае ўніверсальны характар чалавечага вопыту, імкненне да творчасці, якое не ведае меж як часу, так і прасторы, і пастаянна сцвярджае ідэю чалавецтва як адной вялікай сям’і.

Менавіта ў гэтым заключаецца дух Сусветнага дня паэзіі, які ляжыць у аснове ўсёй дзейнасці ЮНЕСКА па ўмацаванні чалавецтва як адзінай супольнасці, – шляхам захавання дакументальнай паэтычнай спадчыны ў рамках праграмы “Памяць свету”, а таксама аховы нематэрыяльнай спадчыны чалавецтва.

На выстаўцы прадстаўлена звыш 60 публікацый на рускай, беларускай і англійскай мовах: кнігі, перыядычныя выданні, брашуры, буклеты.

Экспазіцыя змяшчае наступныя тэматычныя раздзелы:

Паэзія і яе роля ў захаванні і развіцці духоўнай спадчыны і культурнай разнастайнасці народаў.
Паэзія народаў свету.
Руская паэзія.
Беларуская паэзія і перспектывы яе развіцця.

Выстаўка будзе цікавай лінгвістам, філолагам, супрацоўнікам устаноў культуры і мастацтва, гісторыкам, а таксама шырокаму кругу чытачоў, якія цікавяцца паэзіяй і культурнай разнастайнасцю.

Спіс літаратуры

Карысныя спасылкі

Верша цудоўны тэатр

Інфармацыйныя рэсурсы

Паслугі