З 3 жніўня па 6 кастрычніка ў зале дакументаў па мастацтве (пам. 306) праходзіць кніжна-ілюстрацыйная выстаўка “Вечны горад: гарадскі пейзаж у выяўленчым мастацтве”.
У экспазіцыі прадстаўлены творы жывапісу і графікі з фондаў Нацыянальнай бібліятэкі Беларусі.
Вечна зменлівы вобраз горада шматаблічны і невычэрпны. Ва ўсе часы мастакі розных эпох і стыляў неаднаразова звярталіся да гэтай тэмы, імкнучыся адлюстраваць сваё суб’ектыўнае бачанне гарадскога жыцця, перадаць неспакойную атмасферу ранішніх вуліц, захаваць таямнічую цішыню заснежаных маставых, улавіць мерную плынь часу ў старых кварталах…
Ужо ў творах сярэдневяковых мастакоў, якія імкнуліся паказаць “відовішча свету зямнога”, прасочваюцца элементы гарадскога пейзажу.
Як самастойны жанр у мастацтве гарадскі пейзаж склаўся ў ХVIII стагоддзі ў творчасці венецыянскіх ведутыстаў Каналета, Б. Белота, Ф. Гвардзі, работы якіх захапляюць раскошай архітэктурных ансамбляў позняга кватрачэнта, пышнасцю італьянскіх палацаў.
Новае гучанне гарадскі пейзаж набыў у творчасці імпрэсіяністаў. На палотнах К. Манэ, К. Пісаро, А. Сіслея ўвасоблены вобраз Парыжа з прасторнымі плошчамі, шматлікімі кафэ, вакзаламі і паркамі. Дынамічныя пабудовы, асіметрыя, эскізная манера пісьма, сілуэты мітуслівых прахожых, карэт, дрэў ствараюць цэласнасць і рытмічнае адзінства.
Значную частку экспазіцыі склалі гарадскія пейзажы беларускіх мастакоў. Сярод іх – работы М. Шагала, М. Данцыга, Л. Гоманава, Ф. Гумена і іншых, у якіх увасоблены панарамы гарадоў і помнікі архітэктуры, што ўяўляюць неад’емную частку культурнай спадчыны Беларусі.
На выстаўцы таксама прадстаўлены творы “рускага Каналета” Ф. Аляксеева, які з высакароднай стрыманасцю перадаў непаўторнае аблічча строгай архітэктуры Пецярбурга і Масквы, паўсядзённае вулічнае жыццё і абаянне вялікага горада.
Не пакінуць раўнадушнымі наведвальнікаў і графічныя гарадскія пейзажы. Сярод дакументаў, што дэманструюцца на экспазіцыі, знакамітыя панарамы А. Зубава – гравёра пятроўскай эпохі, гравюры А. Астраумавай-Лебедзевай і інш.
Усяго на выстаўцы прадстаўлена звыш 50 дакументаў, у ліку якіх альбомы рэпрадукцый, паштоўкі, кнігі і артыкулы.
Кантактны тэлефон: (8 017) 293 27 53.
 |
 |
 |
 |
 |
 |
 |
 |
 |
