З 14 мая па 9 чэрвеня ў зале дакументаў міжнародных арганізацый (пам. 207g) адкрыта выстаўка "Усё розныя, усе ўнікальныя", прысвечаная Сусветнаму дню культурнай разнастайнасці ў імя дыялогу і развіцця.
Гэты Дзень быў абвешчаны Генеральнай Асамблеяй ААН 20 снежня 2002 года (рэзалюцыя A/RES/57/249) і штогод святкуецца 21 мая, пачынаючы з 2003 года.
У рэзалюцыі адзначаецца, што справядлівы абмен і дыялог паміж цывілізацыямі і культурамі на аснове паразумення, павагі і роўнай цэннасці ўсіх культур з’яўляецца неабходнай умовай для дасягнення сацыяльнай з’яднанасці і міру паміж народамі.
Культурная разнастайнасць – гэта найкаштоўнейшы актыў, які з’яўляецца абавязковай умовай у справе скарачэння маштабаў галечы і дасягнення ўстойлівага развіцця. Множнасць культур з’яўляецца рухаючай сілай развіцця не толькі ў напрамку эканамічнага росту, але і сродкам для больш паўнацэннага інтэлектуальнага, эмацыянальнага, маральнага і духоўнага жыцця.
Правядзенне Сусветнага дня культурнай разнастайнасці спрыяе захаванню нацыянальнай самабытнасці, культурнай і моўнай разнастайнасці, матэрыяльнай і нематэрыяльнай культурнай спадчыны.
Штогод у гэты дзень ЮНЕСКА звяртаецца да дзяржаў-членаў, міжурадавых органаў, арганізацый структуры ААН і няўрадавых арганізацый з заклікам прыкладаць намаганні, накіраваныя на паляпшэнне інфармавання грамадскасці і распаўсюджванне ведаў пра цэннасці і багацце культурнай разнастайнасці.
У 2013 годзе ў рамках штогадовага Сусветнага дня культурнай разнастайнасці ў імя дыялогу і развіцця ЮНЕСКА і Альянс цывілізацый ААН далі старт усеагульнай кампаніі пад лозунгам "Зрабі адну справу" ў падтрымку руху за культурную разнастайнасць.
Кампанія падахвочвае людзей і арганізацыі ўсяго свету да прыняцця пэўных мер па падтрымцы культурнай разнастайнасці і праследуе наступныя мэты:
- павышэнне глабальнага ўзроўню дасведчанасці аб важнасці міжкультурнага дыялогу, разнастайнасці і інтэграцыі;
- фарміраванне сусветнай супольнасці людзей, якія імкнуцца падтрымліваць разнастайнасць у рэальным і паўсядзённым жыцці;
- барацьба з палярызацыяй і стэрэатыпамі для паляпшэння паразумення і супрацоўніцтва паміж людзьмі розных культур.
Павышаная ўвага ў апошнія гады надаецца міжнародна-прававому рэгуляванню ў галіне культуры, паколькі культурныя правы складаюць неад’емную частку праў чалавека. У шматлікіх міжнародных прававых актах замацавана права кожнага чалавека мець магчымасць удзельнічаць у культурным жыцці па сваім выбары і прытрымлівацца сваіх культурных традыцый. Гэтыя прынцыпы адлюстраваны ва Усеагульнай дэкларацыі аб культурнай разнастайнасці, прынятай ЮНЕСКА ў 2001 годзе. Гэта Дэкларацыя з’явілася першым міжнародным прававым інструментам, прысвечаным культурнай разнастайнасці. Яна ўключае сукупнасць кіруючых прынцыпаў для стварэння больш міралюбівага і справядлівага грамадства, якое засноўваецца на ўзаемнай павазе і памяркоўнасці.
На выстаўцы прадстаўлена больш за 70 дакументаў на рускай, англійскай, французскай і нямецкай мовах. Вялікую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы ААН, перыядычныя выданні, буклеты.
Экспазіцыя ўключае наступныя тэматычныя раздзелы:
- Культурны дыялог у інтарэсах устойлівага развіцця.
- Збліжэнне культур і працэс светабудаўніцтва: культура свету.
- Міжрэлігійны дыялог – важны кампанент збліжэння культур.
- Ахова моўнай разнастайнасці і заахвочванне шматмоўя.
- Ахова матэрыяльнай і нематэрыяльнай культурнай спадчыны як фактар збліжэння культур.
Выстаўка будзе цікавая лінгвістам, філолагам, супрацоўнікам устаноў культуры і мастацтва, гісторыкам, а таксама шырокаму кругу чытачоў, якія цікавяцца пытаннямі ўзаемадзеяння культур, моўнай і культурнай разнастайнасцю.
Карысныя спасылкі
- Сусветны дзень культурнай разнастайнасці ў імя дыялогу і развіцця
- Міжнародны год збліжэння культур (A/RES/62/90)
- Міжнародны год моў (A/RES/61/266)
- Альянс цывілізацый
- Дыялог паміж цывілізацыямі і культура міру
Дакументы
- Астанінская дэкларацыя, прынятая ўдзельнікамі канферэнцыі міністраў па тэме "Агульны мір: прагрэс праз разнастайнасць" (Казахстан, 17 кастрычніка 2008 г.)
- Пнампеньскі дыялог аб міжканфесійным супрацоўніцтве ў інтарэсах міру і згоды (2008)
- Бакінская дэкларацыя аб пашырэнні ролі жанчын у міжкультурным дыялогу
- Дэкларацыя ААН аб правах карэнных народаў (2007)
- Дэкларацыя аб садзейнічанні дыялогу і паразуменню паміж рэлігіямі і цывілізацыямі ("Охрыд 2007")
- Дэкларацыя Другога з’езда сусветных і традыцыйных рэлігій (23–24 верасня 2006 г., Астана, Казахстан)
- Балійская дэкларацыя аб наладжванні гарманічных міжканфесійных адносін у рамках міжнароднай супольнасці (21–22 ліпеня 2005 г., Балі, Інданезія)
- Канвенцыя аб ахове і заахвочванні разнастайнасці форм культурнага самавыяўлення (2005)
- Канвенцыя аб ахове нематэрыяльнай культурнай спадчыны (2003)
- Усеагульная дэкларацыя ЮНЕСКА аб культурнай разнастайнасці (2001)
- Глабальны парадак дня для дыялогу паміж цывілізацыямі (2001)
- Дэкларацыя аб культуры міру і праграма дзеянняў у гэтай галіне (1999)
- Тэгеранская дэкларацыя аб дыялогу паміж цывілізацыямі, прынятая на Ісламскім сімпозіуме па дыялогу паміж цывілізацыямі (1999)
Кантактны тэлефон: (8 017) 293 27 34.