Тэматычная выстава “Усё пра дыябет”, прысвечаная Сусветнаму дню барацьбы з дыябетам, адкрыта з 8 лістапада па 5 снежня ў зале дакументаў міжнародных арганізацый (пам. 207g).
Упершыню гэты Дзень адзначаўся 14 лістапада 1991 года сумеснымі намаганнямі Міжнароднай дыябетычнай федэрацыі (IDF) і Сусветнай арганізацыі аховы здароўя. Дата была абраная ў знак прызнання заслуг аднаго з адкрывальнікаў інсуліну – канадскага вучонага Фрэдэрыка Бантынга, які нарадзіўся 14 лістапада 1891 года. За гэта адкрыццё ён сумесна з іншымі навукоўцамі быў ганараваны ў 1923 годзе Нобелеўскай прэміяй.
Генеральная асамблея ААН 20 лістапада 2006 года прыняла рэзалюцыю A/RES/61/225, у якой імклівы рост захворвання дыябетам быў абвешчаны надзвычайнай пагрозай для ўсёй сусветнай супольнасці. Асамблея пастанавіла штогод адзначаць Сусветны дзень барацьбы з дыябетам пад эгідай ААН пачынаючы з 2007 года.
Прапанаваная ўвазе карыстальнікаў выстава налічвае каля 70 дакументаў на рускай і англійскай мовах – кнігі, перыядычныя выданні, буклеты, якія раскрываюць дзейнасць Сусветнай арганізацыі здароўя, Міжнароднай дыябетычнай федэрацыі і іншых арганізацый, накіраваную на павышэнне дасведчанасці насельніцтва аб цукровым дыябеце і яго ўскладненнях.
Экспазіцыя пазнаёміць чытача з гэтай сур’ёзнай медыка-сацыяльнай праблемай XXI стагоддзя, з праграмамі і стратэгіямі дыягнаставання і лячэння дыябету, а таксама комплексам мер, якія прымаюцца на міжнародным і нацыянальным узроўнях для прадухілення развіцця гэтай хваробы.
Сярод прадстаўленых на выставе дакументаў – манаграфіі, энцыклапедыі і даведнікі, практычныя дапаможнікі і інструкцыі для дыябетыкаў па дыетычным харчаванні і інш.
Экспазіцыя ўключае наступныя тэматычныя раздзелы:
- Дыябет: дыягностыка, лячэнне, прафілактыка
- Харчаванне пры цукровым дыябеце
- Ахова здароўя і меры, накіраваныя на барацьбу з дыябетам у Беларусі
Выстава будзе карысная спецыялістам у галіне аховы здароўя, медыцынскім работнікам, навуковым супрацоўнікам, выкладчыкам, студэнтам вышэйшых навучальных устаноў, а таксама ўсім, хто цікавіцца пытаннямі здаровага ладу жыцця і мерамі, накіраванымі на папярэджанне дыябету і яго ускладненняў.
Рост распаўсюджанасці цукровага дыябету ўяўляе сабой рэальную пагрозу ва ўсім свеце. Па даных Міжнароднай дыябетычнай федэрацыі за 2021 год, больш за 537 мільёнаў чалавек у свеце жывуць з дыябетам. Экспертамі адзначаецца, што захворванне штогод павялічваецца ва ўсіх краінах на 5–7 %, а кожныя 15 гадоў колькасць хворых на дыябет падвойваецца, такім чынам, катастрафічны рост колькасці хворых прымае характар неінфекцыйнай эпідэміі.
Тэма Сусветнага дня барацьбы з дыябетам у 2021–2023 гадах прысвечана доступу да лячэння дыябету. Праз 100 гадоў пасля адкрыцця інсуліну мільёны людзей з дыябетам не могуць атрымаць неабходны ім догляд і падтрымку, каб кіраваць сваім станам і пазбягаць ускладненняў.
У нашай краіне Сусветны дзень дыябету праводзіцца па ініцыятыве Міністэрства аховы здароўя Рэспублікі Беларусь з улікам рэкамендацый СААЗ і Міжнароднай дыябетычнай федэрацыі. На 1 студзеня 2022 года ў Беларусі на дыспансерным уліку знаходзілася больш за 360,5 тысячы пацыентаў з цукровым дыябетам.
Карысныя спасылкі
- Сусветны дзень барацьбы з дыябетам
- Асноўныя звесткі аб дыябеце
- Міжнародная дыябетычная федэрацыя
- Сусветная арганізацыя аховы здароўя
- World Diabetes Day (WDD)
- Глабальны даклад па дыябеце
З пералікам літаратуры да выстаўкі “Усё пра дыябет” можна азнаёміцца ў раздзеле “Спісы літаратуры да выставак за 2023 год”.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 26.
Матэрыял пададзены аддзелам абслугоўвання афіцыйнымі дакументамі.
