11 верасня 2007 года а 16-й гадзіне ў галерэі "Лабірынт" адбылось ўрачыстае адкрыццё музейнай экспазіцыі "Нацыянальная бібліятэка Беларусі. Вехі гісторыі".
Экспазіцыя прысвечана 85-годдзю Нацыянальнай бібліятэкі Беларусі і паказвае асноўныя этапы яе станаўлення і развіцця, дазваляе прасачыць багатую гісторыю галоўнай бібліятэкі краіны і раскрывае пераемнасць традыцый, закладзеных некалькімі пакаленнямі беларускіх навукоўцаў, бібліятэкараў, бібліёграфаў.
У рамках выстаўкі прадстаўлены імёны такіх асоб, як першы дырэктар бібліятэкі Іосіф Бенцыянавіч Сіманоўскі; бібліёграф, першая загадчыца аддзела беларускай літаратуры Юлія Іосіфаўна Бібіла; бібліёграф, заслужаны дзеяч культуры БССР Ніна Барысаўна Ватацы і іншыя.
Экспазіцыя размешчана ў Музеі кнігі Нацыянальнай бібліятэкі Беларусі і пабудавана на арыгінальных матэрыялах з фондаў бібліятэкі і копіях архіўных дакументаў. Дэманструюцца навуковыя, бібліяграфічныя выданні бібліятэкі, унікальныя фотаздымкі, рукапісы, дакументы з асабістых архіваў вядомых бібліятэчных дзеячаў, узнагароды бібліятэкі, у тым ліку ордэн Працоўнага Чырвонага сцяга (1972), а таксама падарункі, перададзеныя падчас юбілеяў і візітаў гасцей. Прадстаўлены дакументы і матэрыялы па будаўніцтву бібліятэкі: праекты архітэктараў Г. Лаўрова (1929), М. Вінаградава і В. Крамарэнкі (1989, 2001). Сярод экспанатаў - сімвалічны ключ і макет новага будынка.
Кантактныя тэлефоны: (8-017) 293-27-22