З 15 красавіка па 30 мая 2009 года ў зале беларускай літаратуры (пам. 205) праходзіць юбілейная кніжная выстаўка "Універсальнасць таленту", прысвечаная 75-годдзю Уладзіміра Міхайлавіча Конана.
Уладзімір Конан – беларускі вучоны, які працуе ў галіне філасофіі, культуралогіі і гісторыі, літаратурнай крытыкі. Ён даследуе тэарэтыка-метадалагічныя праблемы філасофіі і культуралогіі, гісторыю эстэтычнай думкі, пытанні фалькларыстыкі і літаратуразнаўства. За цыкл работ па гісторыі філасофскай і грамадскай думкі Беларусі, апублікаваных у 1973–1980 гг., вучонаму прысуджана Дзяржаўная прэмія Беларусі (1984).
На выстаўцы прадстаўлена больш за 120 выданняў, якія сістэматызаваны ў тры раздзелы. У першым раздзеле "Навуковыя далягляды У. Конана" экспануюцца асобныя выданні навуковых прац Уладзіміра Міхайлавіча: "Развіццё эстэтычнай думкі ў Беларусі (1917–1934 гг.)" (1968), "Демократическая эстетика Белоруссии (1905–1917 гг.)" (1971), "Очерк истории эстетической мысли Белоруссии" (у сааўтарстве з Э. Дарашэвічам) (1972), "Адам Бабарэка: крытыка-біяграфічны нарыс" (1976), "От Ренессанса к классицизму: становление эстетической мысли Белоруссии в ХVI–ХVIII вв." (1978), " Эстетическая мысль Советской Белоруссии (основные этапы становления и развития)" (1978).
Плённымі для таленавітага даследчыка былі таксама 80-я і 90-я гг. XX ст. У гэтыя гады з друку выйшлі наступныя выданні аўтара: "Становление и развитие эстетической мысли Белоруссии (Х в. – 1917 г.)" (1981), "Проблемы искусства и эстетики в общественной мысли Белоруссии начала ХХ в." (1985), "Беларуская эстэтыка і мастацкая культура: гістарычныя традыцыі і сучаснасць" (1988), "Святло для людзей: родная мова і культура ў эпоху перабудовы" (1989), "Боская і людская мудрасць (Францішак Скарына: жыццё, творчасць, светапогляд)" (1990), "Святло паэзіі і цені жыцця: лірыка Максіма Багдановіча" (1991).
Вынікам працы вучонага за апошнія гады сталі кнігі "Ксёндз Адам Станкевіч і каталіцкае адраджэнне ў Беларусі" (2003) і "Беларуская мастацкая культура эпохі Сярэдневякоўя і Рэнесансу" (2006).
У другім раздзеле "Паміж філасофіяй і мастацтвам" шырока прадстаўлены шматлікія артыкулы, даклады, рэцэнзіі, каментарыі аўтара, змешчаныя ў часопісах, энцыклапедыях і іншых калектыўных зборніках. У гэтым жа раздзеле экспануюцца кнігі іншых аўтараў, у выданні якіх У. Конан удзельнічаў як рэдактар, навуковы рэдактар, рэцэнзент, складальнік.
"Носьбіт святла" – так называецца трэці раздзел экспазіцыі. У ім прадстаўлены публікацыі пра жыццё і навуковую дзейнасць Уладзіміра Міхайлавіча. Аўтарамі артыкулаў, прысвечаных вучонаму, а таксама рэцэнзій на яго творы з’яўляюцца калегі і сябры, у ліку якіх А. Ліс, А. Разанаў, М. Тычына, Л. Галубовіч, В. Акудовіч, В. Коўтун, Ю. Залоска, М. Крукоўскі, Э. Дубянецкі і інш.
Выстаўка ілюстравана фотаздымкамі У. Конана.
Кантактны тэлефон: 293-27-16.