З 10 па 29 лютага 2008 года ў зале беларускай літаратуры (пам. 205) праходзіць кніжная выстаўка «У свеце шчырасці і сонца», прысвечаная 100-годдзю з дня нараджэння Ядвігі Іосіфаўны Бяганскай, беларускай пісьменніцы.
Пра дзяцей і для дзяцей пісала беларуская пісьменніца Ядвіга Бяганская. Яе творы вызначаюцца добрым веданнем дзіцячай псіхалогіі, назіральнасцю, уменнем цікава і займальна будаваць сюжэт. Творчасць пісьменніцы прасякнута пафасам жыццесцвярджэння, вучыць дзяцей дабру, сумленнасці, любові.
Літаратурны дэбют Я. Бяганскай адбыўся ў 1926 г. Вершы яе друкаваліся ў беларускіх перыядычных выданнях. У пасляваенны час пісьменніца пачала працаваць у галіне прозы. Першая аповесць «Далёка на Поўначы», якая расказвае дзецям пра Чукотку, выйшла ў 1954 г. У сувязі з гэтым пісьменніца пісала: «У дзіцячую літаратуру я прыйшла, калі мне споўнілася 46 гадоў».
Экспазіцыя складаецца з 3-х раздзелаў. У першым раздзеле «Дарога да дзіцячых сэрцаў» – прадстаўлены творы Ядвігі Бяганскай. Сярод іх – аповесці і апавяданні: «Далёка на Поўначы» (1954), «Жэнеў галубок» (1958), «Сустрэча з морам» (1962), «Кожны марыць стаць Калумбам» (1968), «Сланечнікі» (1980), «Сонцу і ветру насустрач» (1988) і іншыя. Да ўвагі наведвальнікаў выстаўкі – адна з першых публікацый пісьменніцы – верш «Аб сабе», які быў надрукаваны ў часопісе «Малады араты» ў 1926 г.
Творчая спадчына Я. Бяганскай – вынік не толькі літаратурнай дзейнасці. Шмат часу пісьменніца аддавала перакладам. У 2-м раздзеле выстаўкі – «Адчуваючы пульс жыцця» – прадстаўлены творы іншых аўтараў у перакладзе Ядвігі Іосіфаўны. Ёю перакладзены з польскай мовы аповесці Г. Мушынскай-Гофман «Вера і яе таварышы», Я. Корчака «Кароль Мацюсь Першы», Д. Бянькоўскай «Самая доўгая ноч», Э.Ажэшка «Выбранае» і іншае, са славацкай мовы – раманы М. Крно «Я вярнуся жывы», У. Мінача «Жывыя і мёртвыя», аповесці К. Ярунковай «Брат маўклівага ваўка», Я. Грушоўскага «Яношак» і іншае. Сярод перакладаў з рускай мовы – фантастычная аповесць К. Цыялкоўскага «На месяцы».
Матэрыялы аб жыцці і творчым лёсе Я. Бяганскай прадстаўлены ў раздзеле «Шчодрае сэрца пісьменніцы».
Кантактны тэлефон 293-27-16