З 3 чэрвеня 2008 года Нацыянальная бібліятэка Беларусі прапаноўвае ў дапамогу абітурыентам тэматычную кніжную выстаўку «У добры шлях!».
У сучасным зменлівым свеце кожны павінен навучыцца самастойна выпрацоўваць рацыянальнае і разумнае стаўленне — да прыроды, грамадства і культуры. Грамадства прад’яўляе якасна новыя патрабаванні да адукацыі як спецыфічнаму сацыяльнаму інстытуту, галоўнай мэтай якога выступае не проста перадача агульных і спецыяльных ведаў, уменняў і навыкаў, а фарміраванне чалавечай індывідуальнасці. Веды, інфармацыя, інавацыі становяцца фундаментальным сацыяльна-эканамічным фактарам развіцця любой дзяржавы. Кожная краіна на тых або іншых этапах свайго развіцця стварае сваю нацыянальную сістэму адукацыі зыходзячы з пастаўленых перад ёй мэт, сацыяльна-эканамічных, палітычных і культурных задач, а таксама запатрабаванняў асобы ў атрыманні ведаў. Пры гэтым створаная сістэма не з’яўляецца статычнай, яна пастаянна змяняецца пад уплывам патрабаванняў навукі і тэхнікі, запатрабаванняў і інтарэсаў грамадства і індывіда.
Прадстаўленыя на выстаўцы матэрыялы пазнаёмяць выпускнікоў сярэдняй школы з пералікам спецыяльнасцей, па якіх праводзіцца падрыхтоўка ў навучальных установах Рэспублікі Беларусь, з правіламі прыёму і афармлення дакументаў, з методыкай правядзення ўступных экзаменаў.
Мэта выстаўленых дакументаў — сістэматызаваць вывучаны матэрыял і замацаваць веды абітурыентаў, папярэдзіць магчымыя памылкі і дапамагчы эфектыўна падрыхтавацца да экзаменаў і цэнтралізаванага тэсціравання 2008 года. Кнігі, зборнікі, дапаможнікі, даведнікі змяшчаюць максімум карыснай і неабходнай інфармацыі па ўсіх прадметах. Складзеныя па матэрыялах цэнтралізаванага тэсціравання мінулага года, яны ўключаюць аналіз тыпічныхх памылак, дапушчаных тэсціраванымі, статыстычныя звесткі, каментарыі да адказаў, трэніровачныя тэсты.
Уяўляе цікавасць зборнік «Как найти свою науку и стать ученым» (Мінск, 2007), у якім сабраны афарызмы, ідэі і разважанні выдатных прадстаўнікоў навукі, адукацыі і культуры, вядомых дзяржаўных і грамадскіх дзеячаў; парады, як паспяхова вырашыць тую або іншую праблему на нялёгкім шляху свайго станаўлення.
Прыведзеныя матэрыялы могуць паслужыць падставай да пошуку свайго шляху ў навуцы і творчасці ў любой галіне.
Экспазіцыя знаходзіцца ў кальцавым калідоры другога паверха.
Кантактны тэлефон: 93-28-86
 |
 |
 |
 |
 |
 |
