З 15 па 30 кастрычніка 2008 года ў зале беларускай літаратуры праходзіць тэматычная кніжная выстаўка "ТРАГЕДЫЯ. ГЕРАІЗМ. ПАМЯЦЬ", прымеркаваная да 65-годдзя знішчэння Мінскага гета (1941 – 1943 гг.).
У экспазіцыі больш за 120 выданняў, у якіх расказваецца пра гісторыю Мінскага гета, дзе знайшлі свой апошні прытулак многія яўрэі Беларусі і іншых краін Еўропы. Шэраг матэрыялаў выстаўкі паведамляе пра жорсткі германскі акупацыйны рэжым у Беларусі, які быў накіраваны на ізаляцыю, эксплуатацыю, рабаванне і ліквідацыю яўрэяў. Але нягледзячы на жорсткі тэрор і правядзенне палітыкі генацыду яўрэйскага насельніцтва, вязні Мінскага гета з першых дзён яго заснавання і аж да ліквідацыі вялі цяжкую, няроўную і гераічную барацьбу з ворагам. Трагедыя, гераізм і мужнасць перапляліся ў лёсах людзей у гады Вялікай Айчыннай вайны.
На выстаўцы шырока прадстаўлены розныя матэрыялы па дадзенай тэме: гістарычныя дакументы, стэнаграмы, даследчыцкія і навуковыя працы, успаміны сведкаў і вязняў Мінскага гета, матэрыялы канферэнцый, бібліяграфія. Аўтарамі публікацый з’яўляюцца Г. Смоляр, Э. Іофе, Л. Смілавіцкі, М. Батвіннік , І. Герасімава, З. Шыбека, Я. Басін, Г. Кнацько, А. Рубенчык і інш. Выстаўка ілюстравана фатаграфіямі.
Кантактны тэлефон: 293 27 16.