З 1 ліпеня па 6 верасня ў зале нотных і аўдыядакументаў (п. 305) праходзіць выстаўка “Свет грацыі і прыгажосці”, прысвечаная 150-годдзю з дня нараджэння рускага кампазітара, піяніста, дырыжора А.С. Арэнскага (1861–1906).
Вучань М.А. Рымскага-Корсакава, кіраўнік канцэртаў рускага харавога таварыства (з 1888 г.), кіраўнік пецярбургскай Прыдворнай пеўчай капэлы (з 1895 г.), кампазітар-лірык Антон Сцяпанавіч Арэнскі працаваў пераважна ў камерных вакальна-інструментальных жанрах. Адным з першых сярод рускіх кампазітараў стварыў канцэртныя творы для двух фартэпіяна. З 1901 г. канцэртаваў як піяніст і дырыжор у Расіі і за мяжой.
Самае галоўнае сачыненне А. С. Арэнскага – оперы “Сон на Волзе” (1888), “Рафаэль” (1894), “Наль і Дамаянці” (1903), музыка да “Бахчысарайскага фантана” Пушкіна, балет “Егіпецкія ночы”, дзве сімфоніі, два фартэпіянныя трыа, канцэрт для скрыпкі. У вакальных жанрах кампазітарам створана некалькі царкоўных хораў, мноства рамансаў, кантата “Лясны цар” (па вершы Гётэ ў перакладзе Жукоўскага). Арэнскі – аўтар больш за сотню фартэпіянных п’ес, аб’яднаных у опусныя цыклы, і чатырох сюіт для двух фартэпіяна. Кампазітарам выдадзены “Руководство к практическому изучению гармонии” і “Руководство к изучению формы инструментальной и вокальной музыки”. Сярод яго вучняў – Рахманінаў, Гліэр, Скрабін.
Сачыненні Арэнскага вылучаюцца шчырасцю, прастатой выражэння, майстэрствам, элегантнасцю і тонкасцю фактуры. Яго музыка носіць пераважна лірычны, элегічна-сузіральны характар. За межамі Расіі найбольш папулярныя вальс з сюіты для двух фартэпіяна № 1, фартэпіяннае трыа рэ мінор і “Варыяцыі на тэму Чайкоўскага” для струннага аркестра.
Усе вышэйпералічаныя творы, а таксама артыкулы і кнігі пра кампазітара прадстаўлены на выстаўцы “Свет грацыі і прыгажосці”.
Кантактны тэлефон: 293-27-52.
 |
 |
 |
 |
 |
 |
 |
 |
