З 6 па 19 кастрычніка 2008 года ў аддзеле абслугоўвання афіцыйнымі дакументамі Нацыянальнай бібліятэкі Беларусі (2 паверх, пакой 207) пройдзе тэматычная кніжная выстаўка "Сучасны турызм: стратэгія развіцця".
Выстаўка прысвечана Сусветнаму дню турызму, які заснаваны Генеральнай асамблеяй Сусветнай турысцкай арганізацыі ў 1979 годзе. Свята штогод адзначаецца 27 верасня. Яго мэта - прапаганда турызму, асвятленне яго ўклада ў эканоміку сусветнай супольнасці, развіццё культурных сувязяў і забеспячэнне ўзаемаразумення паміж народамі.
Экспазіцыя ўключае наступныя тэматычныя раздзелы:
- міжнародныя рэкамендацыі і стандарты, нарматыўна-прававыя дакументы ў галіне турызму;
- міжнародны турызм: яго роля і значэнне;
- развіццё індустрыі турызму і турыстычнага бізнэсу ў Рэспубліцы Беларусь.
На выстаўцы прадстаўлена больш за 100 дакументаў: кнігі, брашуры, перыядычныя выданні, мімеаграфаваныя матэрыялы. Вялікую частку выстаўкі складаюць дакументы міжнародных арганізацый (ААН, СГА, ЮНЕСКА, Еўрапейскага саюза, Савета Еўропы) на рускай, французскай і англійскай мовах.
Турызм - гэта адзін з самых распаўсюджаных відаў актыўнага адпачынку, які спрыяе падтрыманню здароўя насельніцтва. У многіх буйных гарадах 27 верасня праходзяць злёты турыстаў, цікавыя фестывалі, святы, прысвечаныя турызму і турыстычнаму бізнэсу. Школьнікі ў суправаджэнні настаўнікаў праходзяць па спецыяльных турыстычных маршрутах, адпачываюць на прыродзе.
Сусветны дзень турызму - свята кожнага, хто хоць раз адчуў сябе падарожнікам, калі выбраўся са штодзённай будзённай мітусні на бераг рэчкі, у лес, поле або ў іншыя прыгожыя месцы, якімі так багата наша зямля. І, вядома ж, гэта свята тых, хто непасрэдна заняты ў сферы турыстычнага бізнесу: супрацоўнікаў турыстычных кампаній, музейных работнікаў, кіраўнікоў і персаналу гасцінічных комплексаў - усіх тых, хто прафесійна забяспечвае паўнацэнны адпачынак.
Выстаўка будзе карысная спецыялістам у галіне турызму, студэнтам вышэйшых навучальных устаноў турыстычнага профілю, а таксама ўсім, хто цікавіцца праблемамі турызму і здаровым ладам жыцця.