З 18 сакавіка па 18 красавіка ў зале беларускай літаратуры (пам. 205) праходзіць выстаўка “Руплівы даследчык Віцебшчыны”, прымеркаваная да 70-годдзя беларускага журналіста і краязнаўца Аркадзя Падліпскага.
Прадмет навуковых інтарэсаў Аркадзя Міхайлавіча – гісторыя Віцебска і Віцебшчыны XIX – пач. XX ст., гісторыя кнігадрукавання і калекцыяніравання ў Беларусі, а таксама дзейнасць асоб, звязаных з Віцебскам. Ён з’яўляецца аўтарам і суаўтарам звыш 40 кніг, альбомаў, брашур, шэрагу артыкулаў у “Беларускай савецкай энцыклапедыі”, “Энцыклапедыі Беларусі”, “Энцыклапедыі гісторыі Беларусі”, “Энцыклапедыі літаратуры і мастацтва Беларусі”, энцыклапедыі “Прырода Беларусі”.
Сярод прадстаўленых на выстаўцы дакументаў – кнігі “Витебская Александровская гимназия (1808–1918)” (1994), “Книга в Витебске” (1999), “Периодическая печать Витебска” (2001), “Путеводитель по еврейским местам Витебска” (2011), “Славного времени год героический” (2013), “Еврейские адреса Витебска” (2013), “Витебские куранты” (2015), “В небе над Витебском” (2015), а таксама артыкулы, апублікаваныя ў часопісах “Беларусь”, “Полымя”, “Неман”, “Маладосць”, “Помнікі гісторыі і культуры Беларусі”, “Мишпоха”, зборніку “Шагаловский международный ежегодник”.
Аркадзь Падліпскі адыграў значную ролю ў аднаўленні ў Віцебску памяці пра М. Шагала, Ю. Пэна, У. Адамава, краязнаўцаў А. Сапунова, М. Нікіфароўскага, У. Стукаліча, Г. Тэадаровіча і інш. Наведвальнікі экспазіцыі маюць магчымасць пазнаёміцца з такімі кнігамі юбіляра, як “Здравнево: здесь жил И.Е. Репин” (1990), “Васильковые годы Марка Шагала” (1997), кнігамі з серыі “Жизнь замечательных людей Витебщины” – “Летчик Григорий Пиотровский” (1997), “Художник Зиновий Горбовец” (1997), “Ботаник Владимир Адамов” (2000), кнігамі з серыі “100 выдатных дзеячаў беларускай культуры” – “Аляксей Сапуноў” (2015), “Мікалай Нікіфароўскі” (2015) і інш.
Усяго выстаўка налічвае звыш 70 выданняў.
Кантактны тэлефон: (8 017) 293 27 16.