22 сакавіка ў бібліятэцы адбудзецца ўрачыстае адкрыццё фотапраекта “Залаты век Галівуда – жанчыны-легенды” пры ўдзеле Пасольства ЗША ў Рэспубліцы Беларусь.
Залаты век галівудскага кіно прыйшоўся на 30–40-я гады XX стагоддзя. Менавіта ў гэты перыяд была створана вялікая колькасць якасных фільмаў з удзелам такіх легендарных актрыс, як Грэта Гарбо, Марлен Дзітрых, Джоан Кроўфард, Ава Гарднер.
На адкрыцці фотапраекта консул Пасольства ЗША ў Рэспубліцы Беларусь Фрэдэрык Стэрн выступіць з лекцыяй “Вялікія жанчыны Галівуда”. Ён раскажа пра мастацтва кінадзіў, абазначыць іх сацыяльна значныя для грамадства ролі як дзеячаў культуры, мастацтва і навукі.
Часовы павераны ў справах ЗША ў Рэспубліцы Беларусь Скот Роланд перадасць у дар Нацыянальнай бібліятэцы 122 дыскі з легендарнымі галівудскімі фільмамі і 23 кнігі, па матывах якіх былі зняты вядомыя галівудскія карціны.
Праграма ўключае прагляд музычнага кінафільма “Тыя, што спяваюць пад дажджом”.
Мерапрыемства пачнецца а 16-й гадзіне ў галерэі “Лабірынт” (3-ці паверх).
Тэлефоны для даведак: (8 017) 293 28 33, 293 27 56.
Е-mail: pr@nlb.by