Выстава была арганізавана бібліятэкай сумесна з Віцебскім абласным краязнаўчым музеем пры ўдзеле Нацыянальнага архіва Рэспублікі Беларусь.
З прывітальным словам да ўдзельнікаў імпрэзы звярнуўся намеснік генеральнага дырэктара Нацыянальнай бібліятэкі Беларусі Аляксандр Суша. Ён прадставіў выставачны праект і адзначыў важнасць супрацы розных інстытуцый у пытанні вывучэння, захавання і папулярызацыі спадчыны выдатнага даследчыка. Нагадаў аб набліжэнні 100-гадовага юбілея Нацыянальнай бібліятэкі Беларусі і распавёў пра гісторыю паступлення кніг са збору А.П. Сапунова ў фонд Нацыянальнай бібліятэкі.
Наступны выступоўца – дырэктар Віцебскага абласнога краязнаўчага музея Таццяна Старынская адзначыла вялікую ролю і значэнне асобы А.П. Сапунова для Віцебшчыны і ў цэлым для Беларусі. Яна падкрэсліла безумоўную вартасць і важнасць супольнай працы і падзякавала калегам за магчымасць паўдзельнічаць у выставачным праекце “Руплівец беларускай даўніны”.
Госці і ўдзельнікі імпрэзы з цікавасцю пазнаёміліся з экспазіцыяй падчас экскурсіі, якую правяла загадчык сектара музейнай дзейнасці навукова-даследчага аддзела кнігазнаўства Таццяна Захарава.
У рамках святкавання 170-годдзя з дня нараджэння А.П. Сапунова 17 сакавіка ў 15.00 у Нацыянальнай бібліятэцы (пам. 346) адбудзецца круглы стол на тэму “Аляксей Сапуноў: спадчына збіральніка віцебскай даўніны”. Плануецца анлайн-трансляцыя.
Выстава “Руплівец беларускай даўніны” будзе працаваць у музеі кнігі (пам. 347) да 2 мая 2021 г.
Дата яе заканчэння можа быць зменена.
Час работы выстаўкі адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 85.
Матэрыял пададзены навукова-даследчым аддзелам кнігазнаўства.
