З 23 жніўня па 20 верасня у Нацыянальнай бібліятэцы Беларусі (3-ці паверх, кальцавы калідор) ладзіцца кніжная выстаўка “Родны мой горад, любоў мая…”, прымеркаваная да 945-годдзя Мінска і Дня горада.
Мінск – сталіца Рэспублікі Беларусь, адміністрацыйны цэнтр Мінскай вобласці і Мінскага раёна, горад-герой.
Назва горада, верагодна, пайшла ад ракі Менкі, на беразе якой і ўзнікла гарадзішча.
Першыя звесткі пра горад Мінск выяўлены ў “Аповесці мінулых гадоў” і адносяцца да падзей 1067 года, калі адбылася бітва на Нямізе паміж полацкім князем Усяславам Чарадзеем і кіеўскім князем Ізяславам Яраславічам.
З часоў бітвы на Нямізе Мінск шмат разоў перажываў узлёты і заняпады. Дароўнай граматай ад 14 сакавіка 1499 года вялікі князь літоўскі Аляксандр надаў гораду самакіраванне паводле Магдэбургскага права, а 12 студзеня 1591 года з пацвярджальным прывілеем Мінск атрымаў свой герб – у блакітным полі выява Маці Божай паміж двума анёламі і херувімамі.
На працягу сваёй амаль тысячагадовай гісторыі Мінск быў цэнтрам удзельнага княства, ваяводства ў складзе Вялікага Княства Літоўскага, губерні Расійскай імперыі, сталіцай БССР.
Сённяшні Мінск – сталіца суверэннай Рэспублікі Беларусь, сучасны еўрапейскі горад з развітой інфраструктурай. Яго архітэктурнае аблічча, якое складалася на працягу стагоддзяў, захавала адбітак культуры розных стыляў і эпох, народаў і рэлігійных канфесій.
Раскрыць невядомыя старонкі жыцця горада, адчуць подых мінулых стагоддзяў і рытм сённяшняга часу, нарэшце, убачыць сталіцу-прыгажуню дапаможа святочная выстаўка “Родны мой горад, любоў мая…”. У экспазіцыю ўключана каля 150 найноўшых выданняў пра гісторыю і сённяшні стан сталіцы. Сабраныя разам факты і падзеі ствараюць яркую карціну агульнай гісторыі горада з усімі яе трагічнымі і радаснымі старонкамі.
Кантактныя тэлефоны: (8 017) 293 28 86, 293 29 80.
 |
 |
 |
||
 |
 |
 |
