З 9 жніўня па 4 верасня ў зале дакументаў міжнародных арганізацый (пам. 207g) праходзіць выстаўка “Разам справімся з бядой!”, прысвечаная Сусветнаму дню гуманітарнай дапамогі.

Гэты Дзень быў абвешчаны на 63-й сесіі Генеральнай Асамблеі ААН у снежні 2008 г. (рэзалюцыя A/RES/63/139) і штогод адзначаецца 19 жніўня. Дата правядзення была абрана не выпадкова – 19 жніўня 2003 г. штаб-кватэра ААН у Багдадзе перанесла тэрарыстычны напад, у выніку якога загінула 22 чалавекі, у тым ліку спецыяльны прадстаўнік Генеральнага сакратара ААН Сержыу Віейра ды Мелу.

У Сусветны дзень гуманітарнай дапамогі аддаецца належнае тым, хто ахвяраваў сваім жыццём пры выкананні гуманітарнага абавязку, і тым, хто працягвае дапамагаць мільёнам людзей. Дзень таксама падкрэслівае ўсё яшчэ актуальную неабходнасць у гуманітарнай дапамозе па ўсім свеце і важнасць міжнароднага супрацоўніцтва па яе аказанні.

Без крызісаў, бедстваў і катастроф на Зямлі не праходзіць ні адзін год. І заўсёды, калі ёсць пацярпеўшыя і тыя, хто жыве ў нястачы, знаходзяцца людзі, якія дапамагаюць ім, сумеснымі намаганнямі спрабуюць палегчыць іх пакуты і даць надзею. Ад Японіі да Судана, ад Пакістана да Афрыканскага Рога гуманітарныя супрацоўнікі аказваюць дапамогу людзям, якія пазбавіліся прытулку, страцілі блізкіх і крыніцы прыбытку.

Гуманітарныя супрацоўнікі часта вымушаны працаваць у вельмі небяспечных сітуацыях, далёка ад свайго дому. Яны нястомна працуюць у самых складаных умовах. Іх намаганнямі ратуецца жыццё людзям у сітуацыях канфлікту і стыхійных бедстваў. Іх дзеянні збліжаюць свет, нагадваючы нам пра тое, што ўсе мы з’яўляемся членамі адной сям’і і аднолькава марым пра мір на планеце, каб усе людзі маглі жыць ва ўмовах бяспекі і не губляць годнасці.

За апошнія дзесяцігоддзі прыкметна ўзрасла здольнасць гуманітарнага таварыства хутка і эфектыўна рэагаваць на крызісы і катастрофы, выкліканыя прыроднымі альбо чалавечымі фактарамі, а таксама апярэджваць іх. Адбылося гэта шмат у чым дзякуючы самаадданай працы шматлікіх тысяч людзей, якія абралі работу ў сферы гуманітарнай дапамогі. Іх справа – гэта наглядная ілюстрацыя таго, што дапамога тым, хто жыве ў нястачы павінна і можа аказвацца незалежна ад месца іхпражывання, нацыянальнасці, сацыяльнай прыналежнасці, рэлігіі, полу, расы або якіх-небудзь іншых прыкмет. Гуманітарная дапамога заснавана на такіх асноўных прынцыпах, як гуманнасць, справядлівасць, нейтральнасць і незалежнасць.

Нягледзячы на прыкметныя дасягненні ў сферы гуманітарных аперацый, цяжкасці, з якімі сутыкаюцца мільёны людзей ва ўсім свеце, дагэтуль вельмі значныя, і неабходнасць у эфектыўных гуманітарных акцыях як ніколі высокая. Прыродныя катастрофы становяцца ўсё больш разбуральнымі і частымі. Шматлікія мірныя грамадзяне да нашых дзён жывуць пад цяжарам доўгіх канфліктаў, якія знясільваюць іх. Міжнароднае гуманітарнае таварыства з дня на дзень сутыкаецца з новымі пагрозамі: змена клімату, хранічная беднасць, харчовы і фінансавы крызісы, недахоп вады і энергіі, міграцыя, рост насельніцтва, урбанізацыя, пандэміі.

Цяжкія наступствы ўзброеных канфліктаў выклікалі неабходнасць станаўлення і развіцця асобнай сферы міжнароднага права – міжнароднага гуманітарнага права, накіраванага на змякчэнне бедстваў вайны, аказанне дапамогі яе ахвярам, гуманізацыю ваенных дзеянняў.

Прапанаваная тэматычная выстаўка раскрывае розныя аспекты міжнароднага супрацоўніцтва ў сферы аказання гуманітарнай дапамогі. У экспазіцыі прадстаўлена каля 60 выданняў: публікацыі замежных і айчынных аўтараў, дакументы міжнародных арганізацый на рускай і англійскай мовах.

Выстаўка ўключае наступныя тэматычныя раздзелы:

Міжнародныя арганізацыі, якія аказваюць гуманітарную дапамогу.
Сусветны вопыт аказання гуманітарнай дапамогі.
Міжнароднае гуманітарнае права.
Чарнобыльская катастрофа і міжнародная гуманітарная дапамога.

Выстаўка адрасавана практычным і навуковым работнікам, выкладчыкам, студэнтам, а таксама ўсім, хто цікавіцца пытаннямі міжнароднага права і міжнародных адносін.

Карысныя спасылкі

Разам справімся з бядой!

Інфармацыйныя рэсурсы

Паслугі