З 29 верасня па 10 лістапада ў зале нотных і аўдыявізуальных дакументаў (пам. 305) праходзіць юбілейная выстаўка “Пясняр рускай тэмы”, прысвечаная 150-годдзю з дня нараджэння рускага кампазітара, піяніста і педагога Аляксандра Грачанінава (1864–1956).
Творчая спадчына Аляксандра Ціханавіча Грачанінава – адна з цікавых старонак рускай музычнай культуры. Народная ў сваёй аснове, яна звязана з лепшымі традыцыямі айчыннай музычнай класікі. Кампазітарам напісаны творы самых розных жанраў і самай разнастайнай тэматыкі. Яго талент ярчэй за ўсё выявіўся ў вакальных творах, харавой і царкоўнай музыцы. Вялікі ўклад А. Грачанінава ў справу збірання, гарманізацыі і апрацоўкі песень народаў. Ва ўсіх яго працах прасочваецца беражлівае стаўленне да народнай творчасці, тонкае адчуванне нацыянальнага стылю.
Аснову экспазіцыі склалі нотныя выданні харавой і вакальнай музыкі аўтара. Сярод іх – хоры і арыі з опер (другая песня Алёшы з оперы "Дабрыня Нікіціч"), хоры да драматычных спектакляў, асобныя харавыя творы, у тым ліку на рускія тэмы, апрацоўкі народных песень, а таксама шэраг духоўных твораў ("Демественная литургия", "Ныне отпущаеши", "Единородный Сыне", "Волною морскою" і інш.), ансамблі, песні і рамансы ("Што ты панікла, зялёная вербачка?", "Востраю сякерай" і інш.).
У ліку экспанатаў – опера “Дабрыня Нікіціч” (1885–1901), шматлікія сачыненні для фартэпіяна, п’есы ў пералажэнні для гітары, творы для балалайкі, кларнета, віяланчэлі і інш.
Адзін з раздзелаў экспазіцыі змяшчае фартэпіянную і вакальна-харавую музыку для дзяцей. Яна яркая, вобразная і простая, напісаная з выдатным веданнем выканальніцкіх магчымасцей дзяцей. Экспануюцца зборнікі і цыклы дзіцячых песень і хораў “Ай, ду-ду!” (1903), “Сняжынкі” (1907), “Поры года” (1908), “Пчолка” (1914) і іншыя; фартэпіянныя зборнікі “Дзіцячы альбом” (1923–1924), “Дзень дзіцяці” (1927), “На зялёным лузе” (1924); оперы “Елаччын сон” (1911), “Мышчын церамок” (1921) для дзіцячага выканання.
Усяго на выстаўцы прадстаўлена каля 90 дакументаў.
Кантактны тэлефон: (8 017) 293 27 52.