З 1 красавіка па 4 мая ў зале дакументаў па мастацтве (пам. 306) праходзіць выстаўка “Пра мінулае і адвечнае”, прысвечаная 75-годдзю з дня нараджэння беларускага мастака Уладзіміра Басалыгі.
Уладзімір Самойлавіч Басалыга – знакаміты беларускі графік, жыццё і творчасць якога моцна знітавана з лёсам роднай зямлі. Культурная і гістарычная спадчына Беларусі сталі галоўнай тэмай яго твораў.
Вядомасць мастаку прынесла серыя літаграфій “Помнікі дойлідства Беларусі”, якая шмат разоў выстаўлялася, друкавалася на паштоўках, плакатах, у кнігах і школьных падручніках. Серыя літаграфій адлюстроўвае помнікі беларускага дойлідства XII–XIX стст. Гэтыя работы вызначылі асаблівасці творчага стылю мастака, сталі адзнакаю яго прыхільнасці да нацыянальнай тэматыкі. Менавіта выявы архітэктурных помнікаў У. Басалыга лічыць сваім галоўным мастацкім творам. Частка дакументаў з гэтай серыі – арыгіналы работ “Замак у Міры” і “Царква ў Малым Мажэйкаве, ХVI ст.” – прадстаўлены на выстаўцы.
Уладзімір Басалыга працуе ў галіне не толькі станковай, але і кніжнай графікі, экслібрыса і дэкаратыўна-прыкладнога мастацтва. Творы кніжнай графікі, сярод якіх ілюстрацыі да кніг “Мая Іліяда” У. Караткевіча (1969), “Вочы ў вочы” Я. Сіпакова (1978), “Случчына” В. Віткі (1981), альбом “Гравюры Францыска Скарыны” (разам з М. Басалыгам, 1972) і іншыя, склалі адзін з раздзелаў экспазіцыі.
Усяго на выстаўцы прадстаўлена каля 50 дакументаў: альбомы, кнігі, эстампы, паштоўкі, рэпрадукцыі і каляровыя аўталітаграфіі.
Выстаўка прызначана для ўсіх тых, хто цікавіцца творчасцю Уладзіміра Басалыгі і беларускай графікай.
Кантактны тэлефон: (8 017) 293 27 53.