З 21 красавіка па 30 мая ў зале беларускай літаратуры (пам. 205) праходзіць тэматычная выстаўка “Палыновы вецер: да 30-годдзя з дня аварыі на Чарнобыльскай АЭС”.
Чарнобыльская аварыя радыкальным чынам змяніла безліч чалавечых лёсаў і назаўсёды ўвайшла ў свядомасць людзей усяго свету як сінонім трагедыі, болю, а таксама мужнасці, ахвярнасці і спагады.
Першы раздзел выстаўкі дае магчымасць наведвальнікам пазнаёміцца з мастацкімі і публіцыстычнымі творамі асобных аўтараў (М. Мятліцкага “Мой боль вырастае да зор…” (2016), І. Шамякіна “Злая зорка” (2000), А. Адамовіча “Апакаліпсіс па графіку” (1992), В. Быкава “Ваўчыная яма” (2001) і г.д.) і калектыўнымі зборнікамі (“Зона бяды” (1990), “Зорка Палын” (1993), “Прайсці праз зону” (1996) і інш.), успамінамі ліквідатараў аварыі і перасяленцаў, часопіснымі артыкуламі, прысвечанымі чарнобыльскай трагедыі. Прадстаўлены як беларуска- і рускамоўныя выданні, так і іншамоўныя.
У другой частцы экспазіцыі змешчаны матэрыялы па экалагічным становішчы Беларусі і ахове здароўя пасля падзей на Чарнобыльскай АЭС, у тым ліку пра дзейнасць Рэспубліканскага навукова-практычнага цэнтра радыяцыйнай медыцыны і экалогіі чалавека і Палескага дзяржаўнага радыяцыйна-экалагічнага запаведніка.
З-за глабальнага ўплыву чарнобыльскай катастрофы яе лічаць не толькі тэхналагічнай і экалагічнай па сваёй прыродзе, але яшчэ і сацыяльнай. Асобным раздзелам прадстаўлена літаратура, якая ўтрымлівае звесткі аб сацыяльна-эканамічных, псіхалагічных і рэлігійных наступствах Чарнобыля на Беларусі.
Завяршае экспазіцыю калекцыя дакументаў, прысвечаных экалагічнаму, сацыяльна-эканамічнаму і культурнаму адраджэнню беларускіх рэгіёнаў, якія сталі заложнікамі радыяцыйнай небяспекі, асаблівасцям развіцця мясцовага турызму. Дадаткова разглядаецца адлюстраванне чарнобыльскай тэмы ў творах выяўленчага мастацтва, кіно.
Усяго выстаўка налічвае больш за 200 дакументаў.
Кантактны тэлефон: (8 017) 293 27 16.
 |
 |
 |
 |
 |
 |
 |
 |
 |
 |
 |
 |
