З 3 жніўня па 10 верасня ў зале беларускай літаратуры (пам. 205) праходзіць юбілейная выстаўка “Паэтычная споведзь сумлення”, прысвечаная 100-годдзю з дня нараджэння народнага пісьменніка Беларусі Пімена Панчанкі (1917–1995).
Пісьменнік, перакладчык, публіцыст, ганаровы акадэмік НАН Беларусі Пімен Емяльянавіч Панчанка – адзін з найбуйнейшых і, бадай, самых няўрымслівых і неспакойных беларускіх паэтаў XX ст. Яго творчасць адзначана мастакоўскімі шуканнямі, эмоцыямі і страсцямі, імкненнем да вы¬сокіх ідэалаў і сумненнямі ў іх. У сваёй аўтабіяграфіі пісьменнік пісаў: “У наш складаны суровы час сорамна займацца вершаванымі забаўкамі, засядацельскай мітуснёй, корпацца ў мішуры прывіднай славы і дробязных крыўдаў. Для мяне самае каштоўнае ў паэзіі – праўда жыцця, праўда пачуццяў маіх сучаснікаў, чалавечнасць”.
Выдадзеныя ў розныя часы выбраныя творы П. Панчанкі, а таксама кнігі паэзіі “Упэўненасць”, “Шырокі свет”, “І вера, і вернасць, і вечнасць”, “Прылучэнне”, “Горкі жолуд”, “Неспакой”, “Мы з тых беларусаў…” і іншыя, складаючы асноўную частку юбілейнай экспазіцыі, адлюстроўваюць шматгранную творчасць паэта.
Несумненна, цікавасць чытачоў выклікае цыкл вершаў “Іранскі дзённік”, які быў створаны пасля наведвання паэтам Ірана, а таксама паэтычныя зборнікі “Кніга вандраванняў і любові”, “Нью-Йоркскія малюнкі”, “Тысяча небасхілаў” – вынікі паездак ў ЗША і іншыя краіны.
Прадстаўленыя ў экспазіцыі кнігі “На паэтычным небасхіле” і “Высокі бераг” пазнаёмяць наведвальнікаў з публіцыстычнай дзейнасцю Пімена Емяльянавіча. Гэта глыбокія літаратурна-крытычныя артыкулы, эсэ, успаміны пра вядомых пісьменнікаў і падзеі літаратурнага жыцця.
Папулярнасць П. Панчанкі па-за межамі Беларусі відавочная. Пра гэта сведчаць шматлікія пераклады яго твораў на рускую, украінскую, балгарскую, сербскую і іншыя мовы. Са зборнікамі перакладаў таксама можна пазнаёміцца на выстаўцы.
Дапаўняюць экспазіцыю выданні пра жыццёвы і творчы шлях юбіляра.
Кантактны тэлефон: (8 017) 293 27 16.