Выстаўка “Падарожжа скрозь стагоддзі. Замкі Беларусі”, прысвечаная нашым архітэктурным каштоўнасцям, праходзіць з 1 красавіка па 30 мая ў зале беларускай літаратуры (пам. 205).
Лепшы спосаб пачаць знаёмства з любой краінай – акунуцца ў яе гісторыю і прайсціся па ключавых месцах старажытнасці, пачуць яе легенды і паданні. А хто ж лепш распавядзе пра падзеі мінулага, як ні замкі Беларусі? Бо яны стагоддзямі назіралі росквіт княжацкіх дынастый і падзенне цэлых дзяржаў, расхіналі свае вароты новым каралям і супрацьстаялі націску бязлітасных заваёўнікаў.
У экспазіцыі прадстаўлены дакументы, якія распавядаюць пра самыя вядомыя замкі нашай Радзімы. Сярод іх жамчужыны беларускага краю – Нясвіжскі і Мірскі, палац Пуслоўскіх у Косава, шэдэўр архітэктурнага барока і класіцызму Ружанскі замак, адзін з самых вялікіх на беларускіх землях – Лідскі, таксама Любчанскі – апошні з замкавых комплексаў Вялікага Княства Літоўскага.
Наведвальнікі бібліятэкі маюць магчымасць пазнаёміцца са шматлікімі выданнямі, сярод якіх часопісныя артыкулы, матэрыялы даследаванняў, асобныя кнігі, якія раскрываюць развіццё беларускай архітэктуры, уздымаюць пытанні рэстаўрацыі і аднаўлення архітэктурных помнікаў, распавядаюць пра гісторыю ўзнікнення замкаў на тэрыторыі Беларусі і гістарычныя падзеі, звязаныя з імі. У экспазіцыі прадстаўлены кнігі знакамітых архітэктараў, краязнаўцаў, пісьменнікаў – А. Федарука, У. Чантурыі, А. Бутэвіча, М. Ткачова і інш. Асобна можна выдзеліць фотаальбом “Беларусь замкавая” – маштабны праект беларускага кнігавыдання ХХI стагоддзя, які прысвечаны помнікам манументальнага дойлідства.
Усяго на выстаўцы налічваецца больш за 130 крыніц.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
