З 5 па 30 верасня 2008 года ў Нацыянальнай бібліятэцы Беларусі праходзіць кніжная выстаўка «Наш старадаўні і вечна юны Мінск», прымеркаваная да Дня горада.
Гарады як людзі. Адны з іх багатыя ўжо «па нараджэнню», іншым даводзіцца накопліваць сілу і аўтарытэт на працягу шматлікіх стагоддзяў. Мінск адносіцца да ліку другіх. Заснаваны як парубежная крэпасць Полацкага княства, Мінск за сваю амаль тысячагадовую гісторыю паспеў пабываць цэнтрам удзельнага княства і ваяводства, губернскім горадам і, нарэшце, сталіцай 10-мільённай дзяржавы. На працягу стагоддзяў Мінск шмат разоў дашчэнту згараў, гінулі яго жыхары, але ён заўсёды адбудоўваўся і яшчэ больш харашэў.
Нацыянальная бібліятэка Беларусі прысвяціла любімаму гораду тэматычную кніжную выстаўку «Наш старадаўні і вечна юны Мінск». У святочнай экспазіцыі прадстаўлены найноўшыя выданні па гісторыі і сённяшняму стану сталіцы. Сабраныя разам факты і падзеі ствараюць яркую карціну гісторыі Мінска з усімі яе горкімі і радаснымі старонкамі.
Гістарычны партрэт горада розных часоў, гісторыі асноўных вуліц і плошчаў, яго архітэктурны воблік, разнастайныя вобразы сталіцы, сацыяльныя партрэты мінчан, звесткі аб узроўні культуры і сацыяльнага забеспячэння - пра ўсё гэта можна даведацца, пагартаўшы старонкі кніг, што сабраны на выстаўцы.
Выстаўка размешчана на 2-м паверсе атрыума.
Кантактны тэлефон: 293-28-86.
 |
 |
