З 12 сакавіка па 13 красавіка ў зале дакументаў міжнародных арганізацый (пам. 207g) адкрыта выстаўка, прысвечаная Сусветнаму метэаралагічнаму дню і 65-годдзю Сусветнай метэаралагічнай арганізацыі.

Сусветны метэаралагічны дзень штогод святкуецца 23 сакавіка пачынаючы з 1961 г. Дата выбрана не выпадкова – у гэты дзень у 1950 г. уступіла ў сілу Канвенцыя, у адпаведнасці з якой была створана Сусветная метэаралагічная арганізацыя (СМА).

СМА бярэ свой пачатак ад Міжнароднай метэаралагічнай арганізацыі (ММА), якая была заснавана ў 1873 г. Арганізацыя з’яўляецца спецыялізаванай установай ААН і аўтарытэтнай крыніцай інфармацыі па пытаннях стану і паводзін атмасферы Зямлі, яе ўзаемадзеяння з акіянамі, утвараемага клімату і ўзнікаючага размеркавання водных рэсурсаў. Склад арганізацыі налічвае 185 краін-членаў і 6 тэрыторый (па стане на 1 студзеня 2015 г.).

Інфармацыя пра надвор’е, клімат і ваду з’яўляецца жыццёва важнай для сацыяльна-эканамічнай дзейнасці чалавецтва. Метэаралагічныя і гідралагічныя прагнозы выкарыстоўваюцца для павышэння вытворчасці сельскагаспадарчай прадукцыі, кіравання воднымі рэсурсамі, для барацьбы супраць апустыньвання, падтрымання бяспечных і эфектыўных перавозак, кантролю забруджванняў, аператыўнага планавання вытворчасці і размеркавання электраэнергіі. Ад кампетэнтнай і зладжанай работы метэаролагаў шмат у чым залежыць стабільнае функцыянаванне цэлых галін эканомікі і прамысловасці, а таксама прадухіленне небяспекі і своечасовая абарона насельніцтва ад наступстваў стыхійных бедстваў, паколькі звыш 80 % усіх стыхійных бедстваў звязаны з надвор’ем.

Надвор’е, клімат і водны цыкл не ведаюць дзяржаўных меж, міжнароднае супрацоўніцтва ў глабальным маштабе з’яўляецца надзвычай важным для развіцця метэаралогіі і аператыўнай гідралогіі. Усе краіны зацікаўлены ў атрыманні інфармацыі пра метэаралагічныя параметры, так як для дакладнага прагнозу надвор’я ў асобнай краіне неабходная інфармацыя з усяго зямнога шара. СМА заахвочвае міжнароднае супрацоўніцтва ў стварэнні сетак для ажыццяўлення метэаралагічных, кліматалагічных, гідралагічных і геафізічных назіранняў, а таксама для абмену адпаведнымі дадзенымі і для іх апрацоўкі і стандартызацыі. Яна таксама ўмацоўвае ўзаемадзеянне паміж нацыянальнымі метэаралагічнымі і гідралагічнымі службамі і спрыяе прымяненню метэаралогіі ў дзяржаўных метэаралагічных службах, сельскай гаспадарцы, авіяцыі, суднаходстве, навакольным асяроддзі, водных аспектах і для змякчэння наступстваў стыхійных бедстваў.

Кожны год СМА святкуе Сусветны метэаралагічны дзень пад вызначаным дэвізам, надаючы асаблівую ўвагу пэўнай і актуальнай на дадзены момант тэме. Дэвіз Сусветнага метэаралагічнага дня ў 2015 годзе – “Веды пра клімат як аснова для дзеянняў па клімаце”. Тэма як ніколі раней своечасовая, паколькі змена клімату датычыцца нас усіх. Яна закранае практычна ўсе сацыяльна-эканамічныя галіны: ад сельскай гаспадаркі да турызму, ад інфраструктуры да аховы здароўя. Яна адбіваецца на стратэгічных рэсурсах, такіх як вада, харч і энергія. Яна запавольвае і нават ставіць пад пагрозу ўстойлівае развіццё. Таму сёння міжнародная супольнасць рухаецца ў напрамку прыняцця смелых рашэнняў і буйнамаштабных рашучых мер па барацьбе супраць змены клімату.

На выстаўцы прадстаўлена звыш 60 дакументаў на рускай і англійскай мовах: кнігі, брашуры, мімеаграфаваныя матэрыялы, перыядычныя выданні.

Экспазіцыя складаецца з наступных тэматычных раздзелаў:

Метэаралогія – навука аб атмасферы Зямлі.
Сучасныя сістэмы назіранняў за надвор’ем.
СМА – 65 гадоў службы ў інтарэсах бяспекі і дабрабыту.
Міжнародныя намаганні па маніторынгу і абароне навакольнага асяроддзя.
Змена клімату і кіраванне воднымі рэсурсамі.

Выстаўка прызначана для спецыялістаў у галіне метэаралогіі, гідралогіі, экалогіі, геафізічных навук, студэнтаў і выкладчыкаў, навуковых работнікаў, а таксама ўсіх, хто цікавіцца пытаннямі змены клімату і аховы навакольнага асяроддзя.

Карысныя спасылкі

Надвор'е, клімат, паветра і вада: назіранні за планетай для бяспечнай і шчаслівай будучыні

Інфармацыйныя рэсурсы

Паслугі