З 2 студзеня па 15 лютага ў зале беларускай літаратуры (пам. 205) праходзіць юбілейная кніжная выстаўка “На мяжы імгнення і вечнасці”, прысвечаная 70-годдзю беларускага пісьменніка Васіля Сямёнавіча Гігевіча.
Творчасць Васіля Гігевіча займае адметнае месца ў агульнай літаратурнай плыні. Першым яго апавяданням уласцівы лірызм, рэалістычнае апісанне падзей, пазнейшыя творы ўзбагачаюцца псіхалагізмам і філасафічнасцю. Пісьменніка хвалююць праблемы кахання і сяброўства, складаны духоўны свет сучасніка і пошук ім мэты і сэнсу жыцця. В. Гігевіч адным з першых пачаў распрацоўваць тэму горада, уплыву навукова-тэхнічнай рэвалюцыі на традыцыйныя мараль і псіхалогію. Аўтар звяртаецца да навукова-сацыяльнай фантастыкі, якая ў творах цесна пераплецена з рэальным жыццём. Актыўна працуе ў стылі антыўтопіі – раманы “Карабель” (1989), “Кентаўры” (1993) і інш.
Сярод прадстаўленай на выстаўцы літаратуры – кнігі прозы Васіля Гігевіча “Спелыя яблыкі” (1976), “Калі ласка, скажы” (1978), “Жыціва” (1980), “Астравы на далёкіх азёрах” (1984), “Доказ ад процілеглага” (1985), “Мелодыі забытых песень” (1988), “Марсіянскае падарожжа” ( 1990), “Крах цывілізацыі” (2012). Да ўвагі наведвальнікаў і пераклады твораў аўтара на іншыя мовы.
Васіль Сямёнавіч па адукацыі не толькі журналіст, але і фізік, якога вельмі хвалююць пытанні бяспекі, звязаныя з эксплуатацыяй АЭС. У 1991 г. у сааўтарстве з Алегам Чарновым пісьменнік напісаў навукова-дакументальную кнігу “Стали воды горькими”, пра трагічныя падзеі Чарнобыля. У сувязі з будаўніцтвам атамнай электрастанцыі ў Беларусі ён выдаў брашуры, прысвечаныя шматлікім праблемам перапрацоўкі, выкарыстання і захавання ядзернага паліва: “Обусловленность строительства АЭС в Беларуси” (2009), “Безопасность АЭС в Беларуси” (2009).
Асобны раздзел экспазіцыі знаёміць з публікацыямі ў энцыклапедычных выданнях, зборніках крытыкі і часопісах, якія раскрываюць жыццё і творчасць В. Гігевіча.
Усяго выстаўка налічвае каля 70 экспанатаў.
Кантактны тэлефон: (8 017) 293 27 16.