З 12 чэрвеня па 17 ліпеня ў зале нотных і аўдыявізуальных дакументаў (пам. 305) праходзіць выстаўка “Музыка падсвядомасці”, прысвечаная 100-годдзю з дня нараджэння сусветна вядомага рускага кампазітара і педагога Галіны Іванаўны Уствольскай (1919–2006).
Займацца музыкай Галіна Уствольская пачала ў сямігадовым узросце. У 1947 г. скончыла Ленінградскую кансерваторыю па класе кампазіцыі (вучылася ў Д.Д. Шастаковіча), праз тры гады – аспірантуру. З 1948 г. на працягу некалькіх дзесяцігоддзяў выкладала кампазіцыю ў музычным вучылішчы пры кансерваторыі. У сваёй творчасці была незалежная і занадта патрабавальная.
Каталог твораў, складзены аўтарам, невялікі і ўключае ў сябе 5 сімфоній, 6 санат і 12 прэлюдый для фартэпіяна, 3 кампазіцыі для рознага складу інструментаў, сюіты, быліну “Сон Сцяпана Разіна”, сімфанічныя паэмы “Агні ў стэпе”, “Подзвіг героя” і актэт. Аднак кожны з гэтых твораў вынашаны і выпакутаваны ў глыбіні ўнутранага свету вялікага і непаўторнага мастака.
Прыхільнікі Галіны Уствольскай у Расіі і за мяжой лічаць яе творчасць узорам духоўнай незалежнасці і шануюць яе музыку за выключна высокую ступень напружанасці, канцэнтравання, апантанасці выказвання. У 1992 годзе Г.І. Уствольская стала лаўрэатам Хайдэльбергскай прэміі за дасягненні ў галіне мастацтва, а ў 1993 годзе названа Чалавекам года.
На выстаўцы прадстаўлены ноты твораў кампазітара, а таксама фонадакументы: канцэрт до мінор для фартэпіяна з аркестрам у выкананні Юрыя Серабракова, дзіцячая сюіта для сімфанічнага аркестра, саната № 3 для фартэпіяна і актэт для рознага складу інструментаў.
Дапаўняюць экспазіцыю кнігі і артыкулы пра творчасць Галіны Іванаўны Уствольскай.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял прадастаўлены аддзелам абслугоўвання спецыялізаванымі фондамі.