З 26 студзеня па 15 лютага 2008 года ў зале беларускай літаратуры (пам. 205) праходзіць выстаўка "Моўныя самацветы", прысвечаная 80-годдзю Георгія Фёдаравіча Юрчанкі, беларускага пісьменніка, мовазнаўца, крытыка, збіральніка фальклору.
Георгій Юрчанка вядомы як аўтар літаратурных пародый і эпіграм. У сваіх творах ён паўстае перад чытачом тонкім і назіральным даследчыкам. Аўтар умее пранікнуць у спецыфіку ідэйна-творчай манеры, выявіць асаблівасці стылю таго або іншага паэта, празаіка, крытыка, у сяброўска-гумарыстычнай ці з’едліва-саркастычнай форме раскрыць сутнасць твора, які парадзіруецца. Пра гэта сведчаць яго кнігі "Распрэжаны Пегас" (1965), "Вярхом на вожыку" (1968), "Немеладычныя мелодыі" (1974), "Парнаскія ўхабы" (1979), "У натхнёнай паграбеньцы" (1983), "Негабляваная пегасня" (1989), “Абаранкі пад хрэнам” (1994).
Больш за паўстагоддзе Георгій Фёдаравіч збіраў і вывучаў народныя моўныя скарбы. Матэрыялам для яго даследаванняў паслужыла родная Мсціслаўшчына. Ні ў адным рэгіёне Беларусі з такой глыбінёй, паўнатой і дакладнасцю не вывучана мясцовая гаворка. Значная частка сабраных матэрыялаў апублікавана ў кнігах-слоўніках: "Дыялектны слоўнік: З гаворак Мсціслаўшчыны" (1966); "Народная сінаніміка" (1969); збор дыялектнай фразеалогіі Мсціслаўшчыны ў 3-х кнігах – " І коціцца і валіцца" (1972), " І сячэ і паліць" (1974), "Слова за слова" (1977); "Народнае вытворнае слова: З гаворкі Мсціслаўшчыны" ў 3-х кнігах (1981, 1983, 1985); "Сучаснае народнае слова: З гаворкі Мсціслаўшчыны" (1988); "Сучасная народная лексіка: З гаворкі Мсціслаўшчыны" (1993,1996,1998); "Крылатыя залацінкі Мсціслаўшчыны" (2001); "Народнае мудраслоўе" (2002). На выстаўцы наведвальнікі маюць магчымасць пазнаёміцца з гэтымі выданнямі.
Асобна прадстаўлены матэрыялы, змешчаныя ў розных зборніках і часопісах.
На выстаўцы можна ўбачыць і навукова-папулярнае выданне аўтара "На мсціслаўскай зямлі ўзгадаваны: Нарыс жыцця і навуковай дзейнасці П.П. Кабекі", якое выйшла ў свет на беларускай і рускай мовах (1986,1991).
Дапаўняе экспазіцыю літаратура аб жыцці і творчым шляху Г. Юрчанкі. Сярод даследчыкаў – Аркадзь Наркевіч, Вера Хацкевіч, Міхась Пазнякоў, Аляксандр Падлужны, Іван Яшкін, Мікалай Крыўко, Павел Сцяцко, Іван Лепешаў, Алесь Яскевіч і іншыя.
Усяго экспазіцыя налічвае каля 70 кніг і часопісаў.
Кантактны тэлефон 293-27-16.
 |
 |
 |
 |
