З 21 студзеня па 5 лютага 2008 года ў зале беларускай літаратуры (пам. 205) праходзіць выстаўка “Дарогамі подзвігаў”, прысвечаная 90-годдзю з дня нараджэння Івана Рыгоравіча Новікава, беларускага пісьменніка, журналіста, заслужанага дзеяча культуры Беларусі, лаўрэата Літаратурнай прэміі імя Я. Коласа (1965), Дзяржаўнай прэміі імя П.М. Лепяшынскага (1968), Дзяржаўнай прэміі Беларусі (1974).
Невычэрпнай тэмай для беларускіх пісьменнікаў з’яўляецца Вялікая Айчынная вайна. Значны ўклад у распрацоўку гэтай тэмы зрабіў таленавіты пісьменнік-дакументаліст Іван Рыгоравіч Новікаў.
Экспазіцыя складаецца з 3-х раздзелаў. Першы раздзел – “Па гарачых слядах гісторыі” знаёміць наведвальнікаў выстаўкі з творамі аўтара. Сярод іх:
- дакументальныя нарысы “Дзесяць тыдняў у Злучаных Штатах Амерыкі” (1958), “Палескае золата” (1959) і іншыя;
- творы, прысвечаныя героям Віцебскага і Мінскага падполля “Тварам да небяспекі” (1967), “Руіны страляюць ва ўпор” (1960–1961), “Дарогі скрыжаваліся ў Мінску” (1964),“Да світання блізка” (1974);
- гістарычныя нарысы “Бессмертие Минска” (1977), “Минск – город-герой” (1986);
- дакументальная аповесць пра Веру Харужую “Сэрца інакш не можа” (“Маладосць”, 1960, № 8), у якой вернуты з небыцця імёны герояў падполля. Рускі варыянт гэтай аповесці пад назвай “Вера Хоружая” выйшаў у Маскве ў 1962 годзе.
Акрамя дакументальных твораў у экспазіцыі прадстаўлены мастацкія творы аўтара –раман “Ачышчэнне” (1987), “Параненая памяць: аповесці, апавяданні” (1990), зборнік фельетонаў “Уласны іншаземец” (1960).
У другім раздзеле экспануюцца творы пісьменніка ў перакладзе на рускую мову.
Матэрыялы апошняга раздзела выстаўкі “Баец. Журналіст. Пісьменнік” раскажуць пра жыццё і творчасць юбіляра.
Кантактны тэлефон 293-27-16.
 |
 |
 |
 |
