З 2 верасня па 10 кастрычніка ў Нацыянальнай бібліятэцы Беларусі (2-гі паверх, кальцавы калідор) ладзіцца кніжная выстаўка “Мінск XXI стагоддзя”, прымеркаваная да Дня горада (10 верасня).
Амаль тысячагадовую гісторыю мае сталіца Рэспублікі Беларусь – горад Мінск. Сёння ён займае годнае месца сярод вядучых гарадоў Еўропы і свету. Але ці добра ведаюць яго жыхары рэспублікі, у тым ліку мінчане? Раскрыць невядомыя старонкі жыцця горада, адчуць подых мінулых стагоддзяў і рытм сённяшняга часу, нарэшце, убачыць сталіцу-прыгажуню дапаможа прапанаваная святочная экспазіцыя.
Кніжная выстаўка запрашае адправіцца ў падарожжа па цэнтры сталіцы, пазнаёміцца з галоўнымі вуліцамі і плошчамі, архітэктурнымі збудаваннямі, манументальнымі помнікамі. Падарожжа будзе не толькі ў прасторы, але і ў часе, каб даведацца, як фарміраваўся горад, што было і што ёсць, што страчана і што набыта.
Структурна выстаўка мае чатыры часткі. У раздзелах “Духоўнае жыццё Мінска” і “Горад ведаў” сабраны кнігі пра дзяржаўныя тэатры, музеі і вядучыя навучальныя ўстановы сталіцы.
Пра найбольш значныя міжнародныя выстаўкі і дзелавыя форумы, а таксама прадпрыемствы горада апавядаюць раздзелы “Цэнтр міжнародных камунікацый” і “Прамысловы і дзелавы цэнтр краіны”.
У экспазіцыю ўключаны каля 150 выданняў па гісторыі і сённяшнім стане сталіцы: альбомы, турыстычныя буклеты, брашуры, выяўленчыя дакументы.
Кантактныя тэлефоны: 293-28-86, 293-29-80.
Увага! У чытальных залах арганізаваны доступ да поўных спісаў літаратуры, прадстаўленай на ўсіх кніжных выстаўках, якія ладзяцца ў бібліятэцы.